Баяр наадмын өдрүүдэд улсын хэмжээнд аврах шуурхай албаны 245, гал унтраах зориулалтын 565, нийт 810 нэгж машин технипк, давхардсан тоогоор 2115 албан хаагч байнгын жижүүрлэлтэд байж үүрэг гүйцэтгэжээ. Энэ үеэр улсын хэмжээнд гал унтраах дуудлага 27, аврах ажиллагааны дуудлага найм ирсэн байна. Аянганд нэг, усанд зургаан хүн осолдсоноос тавынх нь цогцсыг гарган холбогдох газар хүлээлгэн өгч, нэг хүнийг эрэн хайж байна.

Сэлэнгэ аймгийн Хушаат сумын нэгдүгээр багийн нутаг Орхон голд 53 настай, эрэгтэй Г нь энэ сарын 12-ны өдрийн 17:00 цагийн орчимд осолдсоныг аймгийн Онцгой байдлын газраас Аврах отрядын долоон албан хаагч, нэг машинтай эрэн хайж байна.           

Нийслэлийн Баянзүрх дүүргийн 20 дугаар хороо, Хар хошуу Оросын гарам гэдэг газарт усанд хүн осолдсон дуудлага иржээ. Дуудлагын дагуу  нийслэлийн Аврах отрядын есөн албан хаагч очиж 23 настай, эмэгтэй Ү, 20 настай, эрэгтэй А, 20 настай, эмэгтэй М нар усанд осолдсон байсан аж. Иргэн М-г авран эмнэлгийн анхны тусламж үзүүлэн эмнэлгийн байгууллагад шилжүүлжээ. Харин иргэн А, Ү нарын цогцосыг гаргаж дүүргийн Цагдаагийн жижүүрийн бүрэлдэхүүнд шилжүүлэн өгсөн аж.

П.Наран