Азийн 20 хүртэлх насны футзалын аварга шалгаруулах тэмцээний хэсгийн тоглолт өнөөдөр Монгол Улсад эхлэх гэж байна.

2019 онд Малайзад болох тэмцээнд оролцох эрхийн төлөө Зүүн Азийн бүсээс Япон, БНХАУ, Тайвань, Хонгконг, Макао болон Монголын баг хоёр хэсэгт хуваагдан өрсөлдөнө.

С.Эрдэнэ-Очир дасгалжуулагчтай Монголын баг “В” хэсэгт БНХАУ болон Тайваны багуудтай тоглоно. Өнөөдөр Монгол, Тайваны тоглолт 16.00 цагаас эхэлнэ.

Дасгалжуулагч С.Эрдэнэ-Очир энэ удаагийн хоёр тоглолтыг маш сайн хийж, үр дүнд нь бид хэсгээсээ гарч цааш өрсөлдөх эрхийг авах зорилготой гэж байв. Тэрбээр “Футзалны залуучуудын багт 14 хүүхэд бэлтгэл хийж байна. Эхний тоглолтод 13 нь тоглоно. Багийн ахлагч Э.Бат-Оргил хоёр дахь тоглолтод талбайд гарна. Бэлтгэлээ сайжруулахын тулд ОХУ-ын Улаан-Үд хотод нөхөрсөг тоглолт хийсэн байгаа. Энэ удаа бид талбай дээрээ болж байгаа учраас цааш шалгарах эрхийн төлөө хичээх болно. Футзалны тоглогчид маш богино зайд тоглодог учраас хамгийн бага хугацаанд маш их өндөр ачаалал авдаг. Шаардлагатай үед хаалгачийг солиод талбайд таван тоглогч тоглох боломжтой байдаг. Биеийн хүчний болон сэтгэл зүйн бэлтгэл өндөр түвшинд байхыг харуулдаг.” гэсэн юм.