Кино урлагийн шилдгийг шалгаруулах 87 дахь удаагийн “Оскар”-ын шагнал гардуулах ёслол маргааш Холливудад эхлэх гэж байна. Үүнтэй зэрэгцэн Холливудын гудамжинд мансуурч буй “Оскар” -ын бодит хэмжээтэй хөшөөг байрлуулсан нь олон хүний анхаарлыг татжээ. Газар өвдөглөн кокаин сорж буй “Оскар”-ын бодит хэмжээтэй хөшөөг Лос-Анжелесийн артист Пластик Есүс урласан аж. Тэрээр Холливудын нэр алдартай “А” зэрэглэлийн алдартнууд хар тамхины улмаас хорвоог орхиж буйг мэдээгүй мэт царайлан, нууцалж буй асуудалд олны анхаарыг татах үүднээс энэхүү хөшөөг урлажээ.

Энэхүү хөшөө өнгөрсөн пүрэв /II.19/ гаригт 09.00-14.00 цагийн хооронд Холливудын гудамжинд түр байршсан байна. Холливудын албаныхан улаан хивсний ёслол болох газраас холгүй байрлуулсан уг хөшөөг тэр даруй зайлуулсан нь энэ аж.

Б.АНХТУЯА

Эх сурвалж: Daily news