МУИС-ийг хөгжүүлэх стратеги төлөвлөгөөний хүрээнд шилдэг суралцагчийг элсүүлэх, суралцаж байх хугацаандаа сурлага, урлаг, спортын амжилт гаргасан бүх түвшний суралцагчдыг дэмжих, суралцагчдын идэвх чармайлтыг өрнүүлэх зорилготой МУИС-ийн нэрэмжит тэтгэлгийг /2018.11.16/ МУИС-ийн Эрдмийн танхимд гардууллаа.

Тэтгэлэг гардуулах ёслолын ажиллагааг нээж МУИС-ийн захирал, доктор Я.Төмөрбаатар “Бид энэ хичээлийн жилээс Оюутны эрхийг хамгаалах өдрийг угтан 11 дүгээр сарын 16-ны өдрийг “МУИС-ийн нэрэмжит тэтгэлэг олгох өдөр” болгон зарлаж мэргэжлийн ур чадвар, сурлага, урлаг, спортоор сургуульдаа төдийгүй улсдаа манлайлсан оюутнууд, олон улсын чанартай олимпиадуудад тэргүүлсэн, ЭЕШ-аа амжилттай өгч хамгийн өндөр оноогоор сургуульдаа элсэн орсон оюутнууддаа тэтгэлгийн батламжийг гардуулах санаачилгыг эхлүүлж байна” гээд нийт тэтгэлэг гардан авч оюутнуудад багш нар, эцэг эх, ах дүүс, найз нөхдөө баярлуулж буйд нь талархал дэвшүүллээ.

МУИС-ийн захирлын  2018 оны 10 дугаар сарын 23-ны өдрийн А/405 тоот тушаалаар МУИС-д суралцаж буй оюутнуудад олгох тэтгэлгийн шалгуурыг илүү тодорхой болгож, тэтгэлгийн хамрах хүрээ, төрөл, хэмжээг нэмэгдүүлсэн журам батлагдсан юм.

Энэхүү шинэчлэгдсэн журмаар Олон улсын болон улсын олимпиадад байр эзлэн МУИС-д элссэн элсэгчид, ЭЕШ-ын өндөр оноогоор МУИС-д элссэн элсэгчид, Байгаль-Эх лицей сургуулийн өндөр оноотой элсэгчид, Гурваас доошгүй улирал дараалан 3.5-аас доошгүй голч дүнтэй суралцсан бакалаврын суралцагчид, Амжилттай суралцаж буй ахисан түвшний суралцагчид, Шинжлэх ухааны сургуулийн Байгалийн ухааны салбарын Хими, биологи, физик, математик хөтөлбөрийг сонгосон 3 болон түүнээс дээш голч дүнтэй, 2-р түвшний суралцагчид, Олон улсын чанартай урлаг, спортын уралдаан тэмцээнд 1-3 дугаар байр эзэлсэн суралцагчид, Улсын чанартай урлаг, спортын уралдаан тэмцээнд 1-р байр эзэлсэн суралцагчид, Суралцаж буй чиглэлээрээ их дээд сургуулиудын оюутнуудын дунд зохион байгуулагддаг, улсын хэмжээний мэргэжлийн олимпиад, уралдаан тэмцээнд оролцож, эхний 3 байр эзэлсэн суралцагчид зэрэг төрлүүдээр нийт 200 оюутанд “МУИС-ийн нэрэмжит тэтгэлэг” олгов.

Түүнчлэн Япон Улсын Мицүбиши Юу Эф Жи корпорацийн нэрэмжит тэтгэлэг, БНСУ-ын Апру Эф Жи сан, Ок Bae Jung-ийн нэрэмжит тэтгэлгийг мөн гардуулсан юм.

Мөн энэ үеэр МУИС-ийн суралцагчдад олгодог тэтгэлгүүдийг танилцуулах, сурталчлах үйл ажиллагааг тухайн тэтгэлгийг өмнө нь хүртсэн оюутнууд өөрсдийн туршлагаас хуваалцан зохион байгууллаа.

Эх сурвалж: МУИС