Аливаа өвчнөөр өвчлөхгүйн тулд дархлаагаа сайжруулах шаардлагатай. Харин дархлаагаа сайжруулахын тулд зөв хооллох, идэвхтэй хөдөлгөөнтэй байх, стресгүй байхыг мэргэжилтнүүд зөвлөдөг. Үүнээс гадна анагаах ухаанд хүний дархлааг өвөрмөц аргаар сэргээж, халдварт өвчнөөс урьдчилан сэргийлдэг нь дархлаажуулалт. Дархлаажуулалт буюу вакцинаар олон төрлийн халдварт өвчнөөс урьдчилан сэргийлэх бүрэн боломжтой. Монгол Улс үндэсний дархлаажуулалт буюу товлолт вакциныг 1970-оноос эхлүүлжээ. Үүнээс  хойш бага насны хүүхдэд долоон төрлийн вакцин хийх болжээ. Эдгээр долоон вакцины тусламжтайгаар хүүхэд эхээс төрсөн цагаас эхлэн хөхүүл ханиад, сүрьеэ, татран, саа, хепатит А, В, улаан бурхан, гахайн хавдар зэрэг өвчнөөс урьдчилан сэргийлэгдэх юм.