Архангай аймагт Сарлагийн музей, нүүдэлчдийн соёл иргэншлийг судлах олон улсын судалгааны төв байгуулна. Одоогоор зураг төслийг нь гаргасан бөгөөд 5.6 тэрбумын хөрөнгө шаардлагатай гэж аймгийн Боловсролын газрын дарга Ц.Мөнхбат хэлэв. Тэрбээр “Архангай аймгийг нүүдлийн соёл, аялал жуулчлалын олон улсын төв болгон хөгжүүлэх 2019-2030 оны төлөвлөгөөний  хүрээнд сарлагийн музей байгуулах төслийг тусгасан. Энэ талаар арваннэгдүгээр сарын 30-нд хэлэлцэн шийдвэрлэнэ” гэлээ. Мөн тус аймгийн Эрдэнэмандал, Өндөр-Улаан суманд Дэлхийн (Төв Азийн) нүүдэлчдийн түүх, соёлын музей, аялал жуулчлалын цогцолбор барих төлөвлөгөөг боловсруулжээ.