Д.Сарангэрэл сайдын мэдээллээс болоод хэрэглэгчид хохирч байна

Хуучирсан мэдээ: 2018.11.19-нд нийтлэгдсэн

Д.Сарангэрэл сайдын мэдээллээс болоод хэрэглэгчид хохирч байна

Д.Сарангэрэл сайдын мэдээллээс болоод хэрэглэгчид хохирч байна

Эрүүл мэндийн яамнаас /ЭМЯ/ томуугийн үед хүүхдийн дархлаа дэмжих зорилгоор шулуун гэдсээр хийж хэрэглэдэг виферон лааны асуудлаар өнөөдөр /2018.11.19/ мэдээлэл хийсэн.  “Энто” компанийн оруулж ирдэг виферон лааг олон улсад бүрэн судлагдаагүй, эмчилгээний үр дүн нь батлагдаагүй хэмээн мэдэгдсэн юм. Тэгвэл энэ асуудлаар импортлогч “Энто” компаниас хариу мэдээлэл хийлээ.

“Энто” компанийн өмгөөлөгч Ш.Алтангадас “ЭМЯ өнөөдөр 11 цагаас хэвлэлийн хурал зарласан. Уг хуралд “Энто” компанийн оруулж ирдэг виферон лаатай холбоотой нийгэмд үзүүлж буй үр нөлөөний талаар ЭМЯ албан ёсны байр суурь илэрхийллээ. Виферон лаа 2010 онд эмийн бүртгэлд бүртгэгдээд Монголд найм дах жилдээ худалдаалагдаж байна.

Төрийн байгууллагаас хийгдсэн судалгаа байдаг. Тухайлбал, эмийн гаж нөлөөний судалгаанд 2010 онд бүртгэгдсэнээс хойш виферон лаатай холбоотой ямар ч гаж нөлөө илрээгүй. Нөгөөтээгүүр 2010 онд эмийн бүртгэлд  бүртгэгдэхдээ бүртгүүлэх шаардлагатай бүхий л баримт бичгийг бүрдүүлж өгсөн хангалттай материал байсан.

ЭМЯ-ны сайд Д.Сарангэрэл виферон лааны талаар “Бидэнд ямар нэгэн нотолгоо эмийн сөрөг үр нөлөөтэй холбоотой ямар ч баримт одоогийн байдлаар ирүүлээгүй байсан”  гэдгийг хэлж байна лээ. Монгол Улсад эмийн бүртгэх журам гэж  бий. Тэр хууль журамд заасан баримт бичиг буюу судалгааны тайлан дүгнэлтийг өгч эмийн жагсаалтад оруулсан байдаг. Хоёрдугаарт, өмнөх хэвлэлийн хурлаар ЭМЯ-ны сайдын зөрүүтэй мэдээллээс болоод хэн хохироод байгаа вэ гэвэл хэрэглэгч хохирч байна. Иргэдээс бидэнд тайлбар хийгээч ээ гэсэн хүсэлт ирүүлж байгаа.

Сайдын хэлсэнчлэн виферон лаа 1-2 жилд хүүхдийн дархлааг устгадаг уу гэвэл үгүй. Энэ мэдээлэл өнөөдрийн байдлаар үгүйсгэгдэж ЭМЯ-ны байр суурь зөрөлдөж байна.

Өнгөрөгч пүрэв гаригийн байдлаар “Энто” компанийн зүгээс захиргааны хэргийн анхан шатны шүүхэд өргөдөл өгсөн. Уг өргөдөлд компанийн нэр хүндтэй холбоотой, компанийн нэр хүндэд халдсан гэсэн үндэслэлээр шүүхэд хандсан. Тухайлбал, ЭМЯ-ны сайдын мэдээлэл хууль бус болох талаар захиргааны хэргийн шүүхэд нэхэмжлэл өгөөд явж байна. Монгол Улсад огт бүртгэгдээгүй, нотлогдоогүй гэсэн зүйл сүүлийн хэд хоногт яригдах боллоо. Үүнд тайлбар өгөхөд 2018 оны нэгдүгээр сарын 23-ны өдрийн эм зүйн салбар судлалын дүгнэлт байдаг. Уг дүгнэлтэд виферон лаа ямар нэгэн асуудалгүй, эрүүл мэндийн эмнэл зүйн салбарт хэрэглэх боломжтой гэсэн дүгнэлт байгаа” гэж ярилаа.

Дашрамд, ЭМД-ын сангаас хөнгөлөх эмийн жагсаалтад 2015 онд виферон лааг 80 хувь хөнгөлөхөөр болж, 20 тэрбум төгрөгийн хөнгөлөлт үзүүлж, 91 мянган хүн энэ лааг хэрэглэсэн дүн гарсан билээ. Өнөөдрийг хүртэл "виферон" лаанд ЭМД-ын сангаас 3.9 тэрбум төгрөг зарцуулсан байна. 2018 онд хөнгөлөлттэй эмийн хүүхдийн ангиллаас виферон лааг хассан юм.

Э.АРИУН 

Энэ мэдээнд өгөх таны сэтгэгдэл?
2
ЗөвЗөв
1
ТэнэглэлТэнэглэл
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
БурууБуруу
Баярлалаа!
NewsMN Гар утасны хувилбар Татах
NEWS.mn

Мэдээллийн эх сурвалж