Хан-Уул дүүргийн Засаг даргын 2017-2020 оны үйл ажиллагааны хөтөлбөрт тусгагдсан  “Аз жаргалтай гэр бүл” зорилтын хүрээнд, Гэр бүлийн хүчирхийлэлтэй тэмцэх тухай хуульд заасны дагуу Хан-Уул дүүргийн Засаг даргын Тамгын газар, Гэр бүл хүүхэд, залуучуудын хөгжлийн хэлтсийн санаачлагаар 2017 оны 06 дугаар сард гэр бүлийн хүчирхийлэлд өртсөн иргэдийг болзошгүй аюул эрсдэлээс хамгаалах, урьдчилан сэргийлэх үүднээс “Түр хамгаалах байр”-ыг нийслэлийн хэмжээнд анхдагч болон нээсэн. Ингэснээр дүүргийн хэмжээнд хүчирхийлэлд өртсөн хүүхэд, эмэгтэйчүүд, иргэдийг цаг алдалгүй хүлээн авч, хамгааллын үйлчилгээ үзүүлэн, холбон зуучлах нийгмийн ажил үйлчилгээнүүд мэргэжлийн түвшинд хийгдэх боломж бүрдсэн юм.

Өнөөдөр буюу 2018 оны 11 дүгээр сарын 14-ний өдөр НҮБ-ын Хүн амын сан, Засаг даргын Тамгын газар хамтарсан санхүүжилтээр хүчирхийллийн хохирогч нарт үйлчилгээ үзүүлэх “Түр хамгаалах байр”-ыг өргөжүүлэн “Нэг цэгийн үйлчилгээ үзүүлэх төв” болгон нээж, үйл ажиллагаагаа өргөжүүлээд байна.

Нэг цэгийн үйлчилгээ үзүүлэх төвийн нээлтийн үйл ажиллагаанд ХУД-ийн Засаг даргын орлогч А.Амартүвшин, ХУД-ийн Цагдаагийн 2-р хэлтсийн дарга Н.Батбаяр, Гэр бүл хүүхэд залуучуудын хөгжлийн хэлтсийн дарга О.Мягмарсүрэн, НҮБХАС-ийн суурин төлөөлөгч хатагтай Наоми, Швецарийн хөгжлийн агентлагаас н.Эрдэнэсайхан нар болон бусад холбогдох албаны хүмүүс оролцлоо. Үйл ажиллагааг нээж ХУД-ийн Засаг даргын орлогч А.Амартүвшин үг хэллээ.

Засаг даргын орлогч А.Амартүвшин төвийн үйл ажиллагааг нээж үг хэлэхдээ “НҮБХАС-аас 81 сая төгрөг, орон нутгийн төсвөөс 20 орчим сая төгрөгийн санхүүжилт гарган хүчирхийллийн хохирогчид үйлчилгээ үзүүлэх Нэг цэгийн үйлчилгээний төв болгон өргөжүүлж байна. Ингэснээр дүүргийн нийгэм эдийн засгийг хөгжүүлэх үндсэн чиглэл, жендерийн эрх тэгш байдлыг хангах дэд хөтөлбөр болон Монгол Улсын засаг захиргаа, нутаг дэвсгэрийн нэгж, түүний удирдлагын тухай хууль, гэмт хэргээс урьдчилан сэргийлэх тухай хууль, гэр бүлийн хүчирхийлэлтэй тэмцэх тухай хуулиудын хэрэгжилт бүрэн хангагдаж байна.

Аливаа төрлийн хүчирхийллийн хохирогч нарт үйлчилгээ үзүүлэх нэг цэгийн үйлчилгээний төвийн үйл ажиллагааг эхлүүлснээр орон нутагт хүчирхийлэлд өртөж буй хүмүүс, хүүхдүүд, хохирогчийн тоо буурна гэж бид үзэж байгаа бөгөөд эрүүл мэндийн, сэтгэл зүй, хууль эрх зүйн үйлчилгээ, туслалцааг нэг дор нэгтгэж чадсан  нь тус төвийн ач холбогдол өндөр гэдгийг харуулж байгааг дурдах нь зүйтэй.

Цаашид дүүргийн Засаг даргын Тамгын газрын зүгээс тус төвийн гадна, дотор тохижилт, өдөр тутмын үйл ажиллагаанд онцгой анхаарч ажиллана. Мөн нэг цэгийн үйлчилгээ үзүүлэх төвийг нээхэд санхүүгийн туслалцаа үзүүлсэн Нэгдсэн Үндэстний байгууллагын хүн амын сан, Швейцарын хөгжлийн агентлаг, донорууддаа талархал илэрхийлье” хэмээлээ.

2018 оны 08 дугаар сард НҮБ-ын Хүн амын сангийн дэмжлэгээр өмнөх түр хамгаалах байрыг “НЭГ ЦЭГИЙН ҮЙЛЧИЛГЭЭ ҮЗҮҮЛЭХ ТӨВ” болгон өргөжүүлж 71.8 сая төгрөгийн шаардлагатай тоног төхөөрөмж, 10 сая төгрөгийн засвар үйлчилгээг хийж үйл ажиллагааг эхлүүлэхэд бэлэн боллоо. Ингэснээр хүчирхийллийн хохирогчид эрүүл мэнд, хууль эрхзүй, сэтгэлзүйн болон хамгааллын үйлчилгээг нэг дороос авах болсон нь тус төвийн давуу тал билээ.

Мөн “НЭГ ЦЭГИЙН ҮЙЛЧИЛГЭЭ ҮЗҮҮЛЭХ ТӨВ” болгон өргөжүүлэхэд шаардлагатай тоног төхөөрөмж хүлээлгэн өгөх “Санамж бичиг” –т ХУД-ийн Засаг даргын орлогч А.Амартүвшин, НҮБХАС-ийн суурин төлөөлөгч хатагтай Наоми нар гарыг үсэг зурж баталгаажууллаа.

2017 оны 06 дугаар сард нээлтээ хийсэн тус Түр хамгаалах байраар дамжуулан нийт 0-83 насны  98 иргэн эрх зүйн үйлчилгээ авч, үйлчлүүлсэн бөгөөд үүнээс  0-17 насны 74 хүүхэд бусад нь насанд хүрсэн иргэд үйлчлүүлсэн судалгаа байна.

Нэг цэгийн үйлчилгээ үзүүлэх төв болон өргөжин үйлчилгээ явуулж байгаа тус төвд үндсэн мэргэжлээрээ 3-10 жил ажилласан 2 сэтгэлзүйч, 4 нийгмийн ажилтан нар 24 цагийн турш өглөө, оройн ээлжээр тогтмол үйлчилгээ үзүүлэн ажиллаж байна. Тодруулбал Хан-Уул дүүргийн хүчирхийлэлд өртсөн иргэд тус төв дээр ирэх үед нийгмийн ажилтан, сэтгэл зүйч нар юуны өмнө хохирогчдод эрсдлийн үнэлгээ хийж, ямар төрлийн үйлчилгээнүүд шаардлагатайг илрүүлэн, эмнэлэг, шүүх цагдаа, хамтарсан баг зэрэг шаардлагатай байгууллага, хүмүүс рүү нь холбон зуучлах үйлчилгээг үзүүлж, амь нас, эрүүл мэндэд эрсдэл учрах магадлалтай, эсвэл ойрын танил, садан байхгүй хүмүүсийг нэг цэгийн үйлчилгээний төвд 24 цагаас, 1 сарын хугацаанд байрлуулж, эрх зүйн үйлчилгээ үзүүлнэ.

Дүүргийн хүн амын амар тайван, аюулгүй, аз жаргалтай амьдрах нөхцөл байдлыг чухалд үзэн, аливаа төрлийн хүчирхийлэлд өртсөн иргэдэд сэтгэл зүйн болон бие мах бодийн нөхөн сэргээх үйлчилгээг нэг дороос саадгүй авах боломж бүрэн бүрдсэн гэдгээрээ онцлог төв болон нээгдлээ гэж Хан-Уул дүүргийн ЗДТГ-аас мэдээллээ.