Мэргэжлийн сүмо бөхийн 69 дэх Их аварга Хакүхо М.Даваажаргал дөнгөж сая гэр бүлийн хамт Монголдоо ирлээ. Тэрбээр Токиогийн онгоцоор 16.20 цагт газардав. Их аварга Хакүхо энэ удаа VIP бүсээр бус, энгийн бүсээр зорчигчдын хамт гарч ирж, 33 дахь түрүү хүртсэн баярыг нь хуваалцахаар цугласан олон нийтэд хүндэтгэл илэрхийлэв.

Японы мэргэжлийн сүмо бөхийн дээд амжилтыг тогтоож, 33 дахь түрүү хүртсэнээсээ хойш тэрбээр анхны удаа эх орноо зорин ирж байгаа юм.

Мэргэжлийн сүмо бөхийн түүхэн дэх хамгийн дээд амжилтын эзэн болоод буй Их аварга Хакүхо М.Даваажаргал сар шинийн баярт зориулсан үндэсний бөхийн барилдааныг "Бөхийн өргөө"-нд саатаж үзэх бодолтой байгаа гэнэ. Энэ удаа их аварга сар шинийн өдрүүдэд Монголдоо байж амжихгүй бөгөөд битүүнд Япон руу буцаж нисэх юм байна.

Б.ЭНХ

Гэрэл зургийг Н.БАТМӨНХ