Баялаг бүтээгчдийг барьж, хорьж шийтгэж байгаа явдал олон нийтийн анхаарлыг татсан хэвээр байна. Энэ асуудал хууль тогтоох дээд байгууллагын хүрээнд ч багагүй шүүмжлэл дагуулж байгаа юм. Тухайлбал, УИХ-ын гишүүн Ө.Энхтүвшин “Мөнгөтэй, уул уурхайн үйл ажиллагаа эрхэлдэг компанитай хүмүүсийг зориуд онилдог. Тэгээд хэвлэл мэдээллийн хэрэгслээр захиалгатайгаар хувь хүний болон гэр бүл, бизнесийн нэр хүндийг нь юу ч үгүй болтол “булшилж” байгаад хорих ял оноодог үзэгдэл байна. Олон нийт ч хэвлэл мэдээллээр явуулсан тархи угаалтад итгэж “Өө, энэ нөхөр нөгөө л хэргээрээ ял сонсчихож” гэдэг. Ийм байдал бүр нийгмийн сөрөг үзэгдэл болтлоо гаарлаа” хэмээн мэдэгдсэн билээ. Тиймээс шүүхээс хорих ял сонссон зарим бизнес эрхлэгчийн асуудал юу болж байгаа талаар тодруулав.

Тухайлбал, бизнесмэн Г.Буяндорж. Түүнд Дүүргийн Эрүүгийн хэргийн нэгдүгээр шүүхээс Эрүүгийн хуулийн 111.3 дахь хэсэг, мөн 253.1 дэх хэсэгт зааснаар 2.3 жилийн ял оноосон юм. Ийнхүү хорих ял оноосныг Г.Буяндорж болон түүний өмгөөлөгчид хүлээн зөвшөөрөхгүй байгаа бөгөөд нийслэлийн давж заалдах шатны шүүхэд гомдол гаргажээ. Учир нь Г.Буяндорж “Би “Ноёд констракшн” компаниа бусдад хууль бусаар алдсан. Өмчөө буцааж авахаар хууль хяналтын байгууллагад хандсан биш өөрөө хүн гүтгэсэн болж гүтгүүллээ” хэмээн үзэж байгаа аж. Иргэд хоорондын энэхүү өмчийн маргаан, мөн Г.Буяндорж гүтгэх гэдэг зүйл ангиар ял сонссон тухайд зарим хуульч “Г.Буяндорж болон “Ноёд констракшн” компанитай холбоотой асуудал уг нь эрүүгийн биш, иргэний хэрэг байлтай. Хэвлэл мэдээллийн хэрэгслээс харахад, Г.Буяндорж олон жил бизнес эрхэлж, барилгын салбарт тодорхой хөрөнгө оруулалт хийсэн, тэрхүү өмчөө бусдад алдсан гэж ойлгож байгаа. Хэрэв үнэхээр тийм бол Г.Буяндорж хэлмэгдсэн байхыг ч үгүйсгэхгүй” гэсэн байр суурийг илэрхийллээ. Ямартай ч нийслэлийн давж заалдах шатны шүүх хурал удахгүй болно. Энэ шүүх хурал олон нийтийн төдийгүй сэтгүүл зүйн салбарынхны ч анхаарлыг татаж байна. Учир нь бодит хэрэг явдлын талаар тодорхой эх сурвалжийн мэдээлэл, шүүхийн шийдвэр бүхий нотлох баримтад тулгуурлаж нийтлэл бичсэн сэтгүүлчид мөнгөн торгууль ногдуулсан нь сэтгүүлчид эх сурвалжтай нь хамт шийтгэл оноосон бараг анхны тохиолдол юм. Үүнийг сэтгүүл зүйн салбарынхан “Сэтгүүлчийн мэдээлэл олж авах, олон нийтэд бодит эх сурвалж, тодорхой баримтад түшиглэн мэдээлэл хүргэх мэргэжлийн үйл ажиллагаанд ноцтой халдсан хэрэг” гэж үзэж байна.

Л.ДЭЛГЭР