Гэгээн хайрын өдөр буюу Валентины баярыг тохиолдуулан "Guys" хамтлагийнхан "Хайрын бүжиг" тоглолтоо хийх болсон талаар өнөөдөр мэдээлэл хийлээ. Хэвлэлийн бага хуралд "Guys" хамтлагийнхан бүрэн бүрэлдэхүүнээрээ оролцсон юм.  

"Хайрын бүжиг" тоглолтод тус хамтлагийн 18 жилийн турш дуулсан 23 хит дуу дуулагдахаас гадна орчин үеийн тайз, дэлгэц, гэрэл, хөгжмийн эффектийг чадвахлаг хослуулсан, өвөрмөц сонирхолтой найруулгаар тоглолтоо толилуулах аж. Тоглолт 2015 оны хоёрдугаар сарын 14-нд “Чингисийн өргөө”-д болох юм.

"Guys" хамтлагийнхан “Best of the Guys” шилдгийн шилдэг 18 дуунаас бүрдсэн цомог гаргасан байна. Энэ нь "Guys" хамтлагийн зургаа дахь бие даасан цомог бөгөөд гэгээн хайрын өдрөөс эхлэн худалдаанд гарна.

"Guys" хамтлагийн дуучин Х.Бат-Ундралтай тоглолтын талаар ярилцлаа.

-Oлон жил завсарласны эцэст тоглолт хийх болсон сэтгэгдэл ямар байна вэ?

-Сэтгэгдэл маш их өндөр байна. 2006 онд Зун орсон цас хэмээх анхны мюзикл тоглолтыг хийснээс хойш "Guys" хамтлаг есөн жилийн турш тоглолт хийгээгүй байна. Бидний хувьд Монголын хөгжмийн ертөнцөд оршин тогтнож байдгийн хувьд тоглолт хийх болсонд сэтгэл маш их хөдөлж байна. Нөгөөтэйгүүр 1997 оноос хойш манай хамтлагийг сонсож шүтэж ирсэн фэнүүд маань ч гэсэн бид нарын тоглолтыг тэсэн ядан хүлээж байгаа гэдэгт итгэж байна.

-Тоглолтын бэлтгэл ямар шатандаа явж байна вэ?

-Тоглолтын бэлтгэл ажил дуусна гэж байхгүй. Үзэгчиддээ улам илүү сайн зүйл үзүүлж сонсгохын тулд бэлтгэлээ маш сайн хийж байгаа.

-Цаашдаа ямар шинэ уран бүтээл хийхээр төлөвлөж байна вэ?

-"Guys" хамтлаг шинэ уран бүтээл болгондоо үзэгч сонсогчиддоо болон нийгэмдээ юуг уриалан дуудах вэ гэдэг анхаарлаа хандуулдаг. Оны өмнө гаргасан "Good Luck" дуу бол Монголынхоо ард бүмэнд шинэ ондоо амжилт хүссэн дуу. Одоо шинээр гараад байгаа "Зүрх уучил" дуу бол хэн нэгэнд гуниж тунихгүй, салаад явсан ч гэсэн тэр хүнийг уучлах хэрэгтэй гэсэн санаатай. Дараагийн шинэ уран бүтээл бол одоохондоо нууц боловч уншигч, фенүүддээ зориулаад нэрийг нь хэлье. "Эв нэгдэл" гэж дуу удахгүй гарна.

Сонирхуулахад, "Guys" хамтлагийнхан "Best of the Guys" нэртэй аялан тоглолт хийхээр төлөвлөсөн байна. Аялан тоглолт энэ сарын 18-ны өдөр БНСУ-д хийх тоглолтоор эхэлнэ. Дараа нь ирэх гуравдугаар сард АНУ, тавдугаар сард Японд аялан тоглолт үргэлжлэх ажээ.

Б.БИЛГЭЭ