Атланта хотын харцагууд энэ улирлын шилдэг амжилтын эзэд болоод буй багуудын нэг. Майк Буденхолзерийн удирлага дор Жефф Тиг, Эл Хорфорд, Пол Милсапп зэрэг шилдэг гурвалтай,  “Ноён автомат” хочит Кайли Корвэр мэргэн буучтай, сэлгээнээс багаа сэргээх чадамжтай Дэннис Шродёр, Кэнт Бэйзмурь, Майк Скотт туслагчтай Харцагууд энэ улиралд гайхамшгийг бүтээсээр байгаа билээ.

Тэд  сүүлийн 19 тоглолтондоо нэг ч хожигдоогүй байсан бөгөөд мөн нэг сард хамгийн олон буюу 17 хожсон багаар шалгарсан юм. Харин өнөөдөр Нью Орлэнс Пэликансын талбайд зочлон тоглож ялагдлаа. Ийнхүү Атлантагийн залуус найм дахь ялагдлаа хүлээсэн бол харин Хотон шувуунууд хоёр тоглолт дараалан ялалт байгуулсан нь тэдний хувьд сайн мэдээ болж байна. Бэртсэнийхээ дараа анх удаа талбай дээрээ эргэн ирсэн  багийн лидер Энтони Дэвис гайхалтай тоглолт үзүүлж, багаа ялалтад хөтөлсөн гэдгийг онцолмоор байна.

Тус тоглолтод:

Нью Орлэнс Пэликанс:

-Энтони Дэвис 29 оноо, 13 самбар,
-Эрик Гордон 20 оноо, 7 оновчтой дамжуулалт,
-Омер Ашик  9 оноо 17 самбар,
-Тайрик Эванс  15 оноо 12 оновчтой дамжуулалт 5 самбар

Атланта Хоукс:

-Жефф Тиг 21 оноо, 7 оновчтой дамжуулалт,
-Пол Милсапп 15 оноо, 6 самбараас бөмбөг авалт хийсэн байна.

Хэдий ялагдал хүлээсэн ч Буденхолзер болон түүний залуусын бүтээсэн амжилтыг алга ташин баяр хүргэх нь зүйтэй гэж спортынхон үзэж буй ажээ.

Б.АЛТАНГЭРЭЛ