Хэдхэн хоногийн өмнө Лос-Анжелес Кингс багийн дасгалжуулагчийн албанд томилогдоод буй У.Дежарден шинэ багаа удирдан дебьют тоглолтондоо хожил авсан байна. Лос-Анжелес Кингс баг өчигдөр /2018.11.08/ өглөө талбайдаа Колумбус Блю Жакетс багийг хүлээн авч, 4:1 харьцаатай ялалт байгуулахад Д.Браун, Ж.Картер нар тус бүр гоол, гоолын дамжуулалт өгсөн бол А.Аяфалло, А.Копитар нар тус бүр нэг гоол оруулжээ.

Чикаго Блэйкхаукс багийг 10 жил удирдахдаа тогтмол плэй-оффт шалгаруулж, гурвантаа стэнлийн цомыг өргөсөн дасгалжуулагч Ж.Кенневилль ажлаасаа халагдлаа. Мэдээж Ж.Кенневиллийн халагдах шалтгаан бол Чикаго Блэйкхаукс багийн үзүүлж буй тоглолтын үр дүн юм. Чикаго Блэйкхаукс баг улирал эхэлснээс хойш 15 тоглолт хийснээс 6 хожил аваад байгаа бөгөөд сүүлийн 5 тоглолтондоо хожил авч чадаагүй байна. Ямартаа ч Чикаго Блэйкхаукс багийг удирдан ялгуусан амжилт үзүүлж байсан Ж.Кенневиллийн эрин үе дуусч байна. Түүний ажлыг Канад эрхэм Ж.Коллитон авчээ. ҮХЛ-т баг удирдаж байсан туршлагагүй Ж.Коллитон Чикаго Блэйкхаукс багийн 38 дахь дасгалжуулагч болж байгаа бөгөөд мөн лигийн түүхэн дэх хамгийн залуу дасгалжуулагч болж байна.

Нэшвилл Предаторс багийн жигүүрийн довтлогч В.Арвидссон бага зэргийн бэртлийн улмаас өнөөдрийн Колорадо Эвеланш багийн эсрэг тоглолтонд оролцох боломжгүй болсон бол ирэх амралтын өдөр Даллас Старс багтай хийх тоглолтонд оролцоно.

Миннесота Уайлд багийн дэд ахлагч З.Парисе өнөө өглөө ҮХЛ-т 700 дахь оноогоо авсан байна. З.Парисе ҮХЛ-н 700 дахь оноогоо авахдаа Лос-Анжелес Кингс багийн эсрэг тоглолтонд гоол оруулсан. Өдгөө 34 настай З.Парисе 2003 оны драфтаар Нью-Жерси Девилс багт сонгогдон 2005 оноос карьераа эхлүүлсэн бөгөөд 2012 оноос Миннесота Уайлд багт тоглож байна.

Өнөөдөр ҮХЛ-н мөсөн талбайд 10 тоглолт болов. Залуу дасгалжуулагч Ж.Коллитон багаа удирдан дебьют тоглолтоо Каролина Харрикейнз багтай хийсэн ч ялалт авч чадсангүй. Мөн шинэхэн дасгалжуулагчтай болоод байгаа Лос-Анжелес Кингс баг Миннесота Уайлд багт хожигдсон байна.

Б.БЯМБАБАЯР