Жүжигчин Д.Хүрэлхүү  өөрийн том охин Х.Намууны хамт "Тагнуулч аав" хэмээх кинонд тоглож байсан билээ. Тэгвэл энэ удаа бага охин Х.Сүрэнгийн хамт "Асрагч аав" хэмээх кинонд тоглосон байна. Хэдийгээр түүний хоёр охин урлагаас өөр мэргэжил сонгосон ч тэрбээр ийнхүү хоёр охиноо кино урлагт уруу татав бололтой. Сонирхуулахад, түүний  том охин Х.Намуун аавынхаа шинэхэн кино уран бүтээлийг ивээн тэтгэсэн байна. "Wolarsen" нэртэй гоо сайхны брэндээ гарган тун ч амжилттай яваа тэрбээр өмнө нь хэд хэдэн кинонд дүр бүтээж байсан юм.

"Тагнуулч аав" болон "Асрагч аав"  кинонууд нь  хоорондоо ямар нэгэн холбоогүй гэнэ. Жүжигчин Д.Хүрэлхүү  сүүлийн үед ийн аавын тухай кино хийх болсон шалтгаанаа "Аав бол мөнхийн сэдэв, нас маань ч бас аавд тоглох л нас шүү дээ. Би одоо ямар дурлалт хосууд, 18 настай  анхны дурлалаа үзэж байгаа Ромеогийн дүрд тоглоод байлтай нь биш" хэмээжээ.

Таван жилийн дараа "Тагнуулч аав" асрагч болон эргэн ирэхдээ бага охиноо урлагт хөтлөн оруулж ирж буй нь энэ бөгөөд жүжигчин Д.Хүрэлхүүгийн охидтойгоо хамтран ажилласан тус кино маргааш /2018.11.02/ үзэгчдийн хүртээл болох аж.

Э.БУРАМ