Дуучин болох мөрөөдөлдөө хөтлөгдсөн, ковер дуулдаг залуусыг бид мэднэ. Тэгвэл хүсэл мөрөөдөлдөө үнэнч ковер дуучдыг “Син энтэртаймэнт”-ийн хамт олон нэгтгэж байгаа ажээ. Тус энтертайментийнхэн одоогийн байдлаар 20 гаруй ковер дуучдыг эгнээндээ элсүүлээд байгаа бөгөөд олны танил дуучид хүртэл багтсан гэнэ.

Залуу уран бүтээлчдийг дэмжих зорилготой тус студийн хамт олон 2014 оны арванхоёрдугаар сарын 25-нд “Brauhaus” нэртэй ковер жазз тоглолтоо хийсэн бол тэдний дараагийн тоглолт маргааш буюу нэгдүгээр сарын 28-нд “The embassy” ресторанд болно.

“Син энтетаймент”-ийнхэн цаашдаа залуу уран бүтээлчдийг түлхүү дэмжин ажиллах бөгөөд жазз ковер үдшийг хөгжим сонирхогчиддоо тасралтгүй хүргэсээр байх болно гэдгээ ч хэлж байсан юм.

Эл тоглолтын үеэр чадварлаг хоолойтой олонд танигдсан уран бүтээлчдээс гадна шинэ залуу огт танигдаагүй залуу уран бүтээлчдийн гэнэтийн бэлэг дүүрэн байгаа ажээ. Амьд тоглолт, амьдаар дуулдаг дуучингүй болсон энэ үед залуу чадварлаг уран бүтээлчид тоглолт хийх зориг гаргаж байгааг нь үнэлүүштэй.

Э.ТЭКҮ