Испанийн хөлбөмбөгийн аварга шалгаруулах Ла лигийн тоглолтын үеэр Мадридийн Реал багийн довтлогч Криштиан Роналду талбайд зодоон хийж, улаан картаар торгууллаа. 

Өнгөрсөн бямба гаригт Кордов багтай хийсэн тоглолтын 82 дах минутанд Роналду  өрсөлдөгч багийн хамгаалагч Эдимаратай маргалдан улмаар нударга зөрүүлсэн юм. Бразил гаралтай тамирчны хөлийг Роналду өшиглөж, багийнхаа хамгаалагчийг өмөөрөхөөр очсон Дэйвидийг түлхсэн нь  шударга тоглолтыг дэмжиж хүсэмжилдэг олон үзэгч, хөгжөөн дэмжигчдийн дургүйцлийг хүргэсэн юм.  Хүний биед түрүүлэн гар хүрсэн Роналдуд тэр дор нь улаан карт өгч, талбайгаас хөөсөн. Ингэснээр Роналду 4-12 удаагийн тоглолтыг өнжихөөр болж байгаа. Харин энэ бүхний дараа Роналду Эдимарагаас өөрийн биеэр уучлалт хүссэн тул тоглолтын гол шүүгч шийтгэлийг зөөлрүүлж  болно гэдгээ өгүүлжээ. Реалын Кордовтой хийсэн тоглолт  Карим Бензема, Гарет Бейл нар  өрсөлдөгч багийн хаалганд оновчтой цохилт хийснээр 2:1-ийн харьцаатай өндөрлөсөн юм. Испанийн хөлбөмбөгийн аварга шалгаруулах Лалигийг  19 тоглолтын дараах байдлаар Эзэн хааны клуб нийтдээ 48 оноотой  тэргүүлж байна. Харин 20 тоглолт хийсэн Барселон баг 47 оноотой даалж байна. Бүх тоглолтын явцад  Роналду нийт 28 гоол оруулж Испанийн хөлбөмбөгийн аварга шалгаруулах тэмцээнийг хошуучилж байгаа бол  түүний мөнхийн өрсөлдөгч Лионель Месси 21 бөмбөг оруулсан үзүүлэлттэй байна.

Эх сурвалж: http://likenews.mn