Английн Холбооны цомын дөрөвдүгээр шатны тоглолтууд энэ өдрүүдэд явагдаж байгаа билээ. Энэ хүрээнд өнгөрсөн улирлын цомын эзэн "Арсенал" клуб "Брайтон" клубын "Фалмер" цэнгэлдэхэд зочлон тоглож, 3-2 харьцаатай буулгаж авсанаар дараагийн шатанд шалгарлаа.

Тоглолтын нэгдүгээр үеийн ердөө хоёр дахь минутад жил гаруй хугацаанд бэртлийн улмаас талбайд гараагүй байсан "Арсенал"-ын жигүүрийн довтлогч Тео Уолкотт тооны харьцааг нээсэн бол мөн л саяхан бэртлээсээ эргэн ирсэн Герман хагас хамгаалагч Мезут Озил 24 дэх минутад тооны харьцааг 2-0 болгон холдуулсан.

Гэхдээ эзэн багийн довтлогч  О`Грэйди тооны харьцааг 2-1 болгон ойртуулсан боловч уг гоолоос ердөө 9 минутадын дараа "Арсенал"-ын хагас хамгаалагч Томас Росицки гоолдсоноор тооны харьцаа 3-1 болсон юм.

"Брайтон" клуб тийм ч амар бууж өгөхийг хүссэнгүй. Тоглолтын 75 дахь минутад Болдок гоолдон тооны харьцааг 3-2 болгон ойртуулсан боловч үүнээс хойш дахин гоол оруулж чадаагүй юм. Ингэснээр "Арсенал" клуб Английн Холбооны цомын дараагийн шатанд шалгарсан.

Ерөнхийдөө дөрөвдүгээр шат том багуудын хувьд тун халгаатай өнгөрсөн бөгөөд "Челси", "Манчестер Сити" тэмцээнээс хасагдсан бол "Манчестер Юнайтед", "Ливерпүүл" клубүүд нэмэлт тоглолт хийхээр болсон юм.

Бусад тоглолтын үр дүн:

Бристоль Сити 0 : 1 Вест Хэм
Астон Вилла 2 : 1 Борнмут

Эх сурвалж: www.mminfo.mn