Японы ерөнхий сайд Шинзо Абэ өчигдөр /2018.10.25/ Бээжин хотноо хүрэлцэн иржээ. Тэрбээр БНХАУ-д гурав хоногийн хугацаатай ирсэн бөгөөд хамгийн сүүлд долоон жилийн өмнө Японы төрийн тэргүүн БНХАУ-д айлчилж байв. Токио хотоос мордохын өмнө Шинзо Абэ Солонгосын хойгийг цөмийн зэвсгээс ангижруулахад чиглэсэн хоёр талын хамтын ажиллагаа, Хойд Солонгост хулгайлагдсан Японы иргэдийн асуудлыг энэхүү айлчлалынхаа үеэр Хятадын талтай хэлэлцэхээр зорьж байна гэж сэтгүүлчдэд мэдээлжээ. Түүнчлэн, чөлөөт шударга худалдааг өргөжүүлэх, Зүүн Хятадын тэнгист энх тайван, хамтын ажиллагааг бэхжүүлэх асуудлыг хөндөх гэнэ.

Айлчлалын эхний өдөр Шинзо Абэ БНХАУ-ын ерөнхий сайд Ли Көцянтай уулзаж, Япон-Хятадын энх тайван, найрамдлын гэрээ хүчин төгөлдөр болсны 40 жилийн ойн хүлээн авалтад оролцжээ. Айлчлалын хоёр дахь өдөр буюу өнөөдөр Шинзо Абэ БНХАУ-ын дарга Ши Жиньпинтэй уулзах юм байна.

Эх сурвалж:JAPANTIMES