Монголын хошин урлаг хэмээх их айлд цоо шинэ өнгө төрх нэмэн орж ирээд багагүй дуулиан тарьсан жүжигчин Ц.Алдармаа дэлгэцийн бүтээлээр үзэгчидтэйгээ дахин уулзах болсон.

Тэрбээр, “Ядуугийн зовлон 2”, “Маш нууц” киноны хоёрдугаар анги буюу “Байтаг Богд” уран сайхны кинонд тоглож, хэр чадвартай жүжигчин бэ гэдгээ батлан харуулсан. Тэрбээр Монголын Үндэсний кино урлагийн академиас зохион байгуулдаг "Академи авардс-2018" наадмаас шилдэг туслах дүрийн шагналыг хүртсэн билээ.

Хошин урлагаа орхиж, дэлгэцийн уран бүтээлд тоглох болсон Ц.Алдармааг ямар ч дүр тоглож хувирч чадахаа дахин дахин харуулж байна. Тэрбээр нээлтээ хийгээд удаагүй байгаа “Нинжин сэтгэл” кинонд шоронгийн хоригдлын дүр бүтээжээ. Түүнтэй хамт хоригдлын дүр бүтээсэн жүжигчин бол Ц.Өлзийхүү. Найруулагч Ц.Хүсэлбаатарын уг кино жүжигчдээс өндөр үнэлгээ аваад байгаа юм. Хайр дурлал, эд хөрөнгө, өнөөгийн нийгмийн өнгө төрхийг уг кинонд харуулдаг бөгөөд Ц.Алдармаа энэ удаад мөн л туслах дүрийг гайхалтай чадамгай гаргаж чадсан гэдэг үнэлгээг кино шүүмжлэгчид өгчээ.  Амьдралдаа асар том алдаа гаргаж, нэгэнтээ бүдэрч явсан тэрбээр уран бүтээлийн олз омог дүүрэн явна.