Чөлөөт бөхийн тамирчид Унгарыг зорилоо | News.MN

Чөлөөт бөхийн тамирчид Унгарыг зорилоо

Хуучирсан мэдээ: 2018.10.17-нд нийтлэгдсэн

Чөлөөт бөх-ДАШТ 2018

Чөлөөт бөхийн тамирчид Унгарыг зорилоо

Чөлөөт бөхийн ДАШТ ирэх бямба гаригт эхэлнэ

Чөлөөт бөхийн тамирчид Унгарыг зорилоо

Эрэгтэйчүүдийн 49, эмэгтэйчүүдийн 30 дахь удаагийн чөлөөт бөхийн насанд хүрэгчдийн Дэлхийн аварга шалгаруулах тэмцээн (ДАШТ) Унгарын Будапешт хотод энэ сарын 19-25-ны өдрүүдэд зохион байгуулагдана. Уг тэмцээнд оролцох Монгол Улсын баг тамирчдын түрүүч Будапештийг зориод байна.

Энэ удаагийн чөлөөт бөхийн багийн бүрэлдэхүүнд дасгалжуулагчаар Үндэсний шигшээ багийн ахлах дасгалжуулагч Б.Баттулга, гавьяат дасгалжуулагч А.Цэдэнсодном, Ц.Баярсайхан, ОУХМ Б.Батзориг, Ө.Ууганбаяр нар багтсан.

Тамирчдаас “Лондон 2012” олимпийн наадмын хүрэл медальт, ДАШТ-ий хоёр алт, нэг мөнгөн медальт С.Батцэцэг, “Рио 2016” олимпийн наадмын шагналт V байрын эзэн, ДАШТ-ий хошой хүрэл медальт Г.Мандахнаран, ДАШТ-ий хошой хүрэл медаль, “Жакарта 2018” Азийн наадмын аварга Э.Бэхбаяр нарын тэргүүтэй 20 тамирчин барилдах юм. Эдгээр тамирчдаас ДАШТ-д хамгийн олон удаа буюу 10 дахь удаагаа зодоглох тамирчин бол Гавьяат тамирчин О.Насанбурмаа бөгөөд тэрбээр 2006 оноос эхлэн барилдаж эхэлжээ. Мөн анх удаагаа дэлхийн дэвжээнд барилдах таван тамирчин багтсан байна.

Чөлөөт бөхийн ДАШТ-д өрсөлдөх тамирчдын нэрс өнгөрөгч наймдугаар сард сонгон шалгаруулалтын тэмцээнээр эцэслэн тодорсон билээ. Гэвч “Жакарта 2018” Азийн наадамд түрүүлсэн П.Орхоноос допинг илэрсэн учир эмэгтэй багийн бүрэлдэхүүнд багагүй өөрчлөлт орж, нэмэлтээр хоёр тамирчин Унгарыг зорих болсон. Өөрөөр хэлбэл, сонгон шалгаруулалтад эрхээ авч чадаагүй хоёр тамирчин багтсан нь багагүй шүүмжлэлд өртсөн ч энэ талаар албаныхан ямар нэгэн тайлбар хийгээгүй байна. Хэдийгээр ДАШТ-ий бүрэлдэхүүнд өөрчлөлт орсон ч баг тамирчид багагүй хугацаанд бэлтгэлээ эрчимжүүлж Унгарыг зорилоо.

Чөлөөт бөхийн ДАШТ ирэх бямба гаригт (2018.10.20) эрэгтэй 61, 74, 86, 125 кг-ын жингийн барилдаанаар эхлэх хуваарьтай байна. Харин тэмцээний нээлтийн ажиллагаа ням гаригт болж, эрэгтэй жингүүдийн ангилалаар үргэлжлэн явагдана.

“БУДАПЕШТ-2018”: ЧӨЛӨӨТ БӨХ-ДАШТ 

ЭРЭГТЭЙ:

  • 57 кг- Э.Бэхбаяр
  • 61 кг- Т.Түвшинтулга
  • 65 кг- Т.Тулга
  • 70 кг – Б.Бямбадорж
  • 74 кг- Г.Мандахнаран
  • 79 кг- П.Өнөрбат
  • 86 кг- О.Үйтүмэн
  • 92 кг- Л.Төртогтох
  • 97 кг: Ө.Батзул
  • 125 кг- Н.Золбоо

ЭМЭГТЭЙ:

  • 50 кг- Э.Нарангэрэл
  • 53 кг- Э.Сумъяа
  • 55 кг- Э.Даваачимэг
  • 57 кг- А.Батцэцэг
  • 59 кг- Б.Шоовдор
  • 62 кг- Э. Гантуяа
  • 65 кг- Х.Болортуяа
  • 68 кг- С. Батцэцэг
  • 72 кг- О.Насанбурмаа
  • 76 кг- Г.Наранчимэг нар багтсан юм.

ДАШТ-ий шууд дамжуулалтыг https://unitedworldwrestling.org-с үзээрэй.

Ч.БОЛОР

Энэ мэдээнд өгөх таны сэтгэгдэл?
0
ЗөвЗөв
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

1 Сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2018-10-17 202.9.43.87

Явцгүй хүмүүсшүү нэгэндээ хор хийчээд ингээд явж байх гэж хайран тамирчин

NewsMN Гар утасны хувилбар Татах
NEWS.mn

Мэдээллийн эх сурвалж