Английн Манчестер Сити багийн ахлах дасгалжуулагч Мануэль Пеллегрини Барселоны багийн ахлагч Лионель Мессиг илт сонирхож түүнийг багтаа урвуулахаар шийдснээ мэдээлсэн байна. Үүгээр ч зогсохгүй Чилийн мэргэжилтэн Алтан Бөмбөгийн 4 удаагийн эзэн Мессиг 480 сая фунт стерлингээр шилжүүлэн авахад бэлэн гэдгээ Сан сэтгүүлээр дамжуулан хөлбөмбөгийн хөгжөөн дэмжигчдэд уламжилсан байна. 625 сая евро буюу 730 сая ам доллартай тэнцэх энэ мөнгөний 3-ны нэгийг Аргентиний тамирчинтай байгуулсан Барселоны гэрээний нөхөн төлбөрт, үлдсэн нь Мессид оногдох юм байна. Барселонтой 5 жилийн хугацаатай байгуулсан гэрээгээр Месси 20 сая евро авдаг боловч багийн ахлах дасгалжуулагч Лиус Энрекетэй удаа дараалан ам мурийх болсон нь багийн амжилтанд сөргөөр нөлөөлж байгаа гол шалтгааны нэгт тооцогдож байгаа юм. Хэдийгээр Месси багийнхантай муудалцах шалтгаангүй гэдгээ албан ёсоор мэдээлсэн боловч ирэх жилээс чухам ямар клубын нэрийн өмнөөс тэмцээн уралдаанд оролцохоо мэдэхгүй байна гэсэн мэдээлэл ч газар аваад байна. 2003 оноос Барселоны бүрэлдэхүүнд тоглож эхэлсэн Месси энэ багтай 6 удаа Испанийн аваргаар, 2 удаа Испанийн цомын аваргаар шалгарч, 3 удаа Аваргуудын лигт тэргүүлж байсан юм. Өнгөрсөн жилийн 5-р сард клубын удирдлагуудтай 2019 оныг хүртэл хамтран ажиллах гэрээгээ сунгасан боловч багийн доторх атаа жөтөө, өрсөлдөөнөөс болж Манчестер Ситид шилжиж ч мэдэхээр нөхцөл үүсээд байна. Энэ мэдээлэл тархахаас өмнө Олон улсын спортын судалгааны төвөөс Мессиг дэлхийн хөлбөмбөгийн спортын хамгийн үнэ цэнэтэй тоглогч буюу 220 сая еврогоор үнэлж байгаагаа мэдээлж байсан юм.

Эх сурвалж: Likenews.mn