Үндэсний супер лигийн нэгдүгээр тойргийн сүүлийн хоёр тоглолт өнгөрөгч даваа гаригт/01.12/ Спортын төв ордонд болсон билээ. Тэгвэл лигийн хоёрдугаар тойргийн тоглолтоос өчигдрөөс эхэллээ.

ХАН ТАЛСТЫН ИРВЭСҮҮД vs ГЭГЭЭН ХАНГАЙ ЛИДЕР – 112:96.

Лхагва гаригт хоёрдугаар тойргийн эхний хоёр тоглолт боллоо. Энэ өдөр "Хан талстын ирвэсүүд"- "Гэгээн хангай лидер" багуудын хооронд боллоо. Ирвэсүүдээс энэ өдөр Terrence Joyner эзгүй байсан ч түүнийг орлон гараанд гарсан Э.Дорж-Арилд 27 оноо 6 самбараар багаас тэргүүлж улмаар багаа 3 дахь дараалсан хожилд 112-96-аар хөтөлсөн. Түүнд төвийн тоглогч Teeng Akol 25 оноо 24 багийн ахлагч Э.Цэвэлдорж 20 оноо 10 самбар тус тус тусалсанаас гадна 5 тоглогч нь 10-аас дээш оноог энэ өдөр Лидерүүдийн эсрэг авсан байна. Харин "Гэгээн хангай лидер"-ээс Jonathan Blake 34 оноо 9 самбар Э.Дөлгөөн 20 оноо 12 самбар авсан тэд багаараа 36 хувьтай довтолж, 3 шугамын араас 37 шидэж ердөө 11-ыг нь байндаа тусгасан байна. Ингэснээр "Хан талстын ирвэсүүд хүснэгтэнд Эрдэнэдрийлинг Ригс, Танан Гарьд багуудтай адил 6 хожил 5 хожигдолтой бичигдэж эхэлсэн бол "Гэгээн Хангай Лидер" 3 хожил 8 хожигдолтой хүснэгтийн сүүлийг мушгих боллоо.

ИХ ӨРГӨӨ АРАВТУУД vs ДОРНОД ТАНАН ГАРЬД – 85:81

2-р тойргийн 2 дахь тоглолтын өмнө 1-р тойрогийн шилдэг тоглогчийг тодруулан шагналыг гардуулан өгсөн юм. 1-р тойргийн шилдэг тоглогчоор багаа 6 хожил 4 хожигдолтой 2-р байранд бичүүлж чадсан "Дорнод Танан Гарьд" багийн хамгаалагч Цэрэндагвагийн Азбаяр тодорсон. Тэрээр эхний тойрогт 23,1 оноо 7,3 оновчтой дамжуулалт 6,7 самбараас бөмбөг авалт 2,3 бөмбөг таслалтыг нэг тоглолтод дундчилсан үзүүлэлтээр дээрх шагналыг хүртсэн юм.

Улмаар "Танан Гарьд" энэ өдөр Аравтуудын эсрэг 2-р тойргийн эхний тоглолтоо хийлээ. Сүүлийн 2 тоглолтондоо аль аль нь дараалсан 2 хожил байгуулаад байсан 2 багийн хувьд тун чухал тоглолт байсан бөгөөд энэ удаад Аравтууд 1-р тойрогт хожигдсон хариугаа чангахан авлаа. Төвийн тоглогч Aundre Williams бага зэрэг бэртэлтэй хараахан өөрийн тоглолтоо харуулж чадаагүй ч Jordan McCoy талбайн бүхий л талд давамгай байж багаа 7 дахь хожилд нь хөтөлж чадсан юм. Тэрээр Гарьдуудын эсрэг 26 оноо 15 самбар авсан бол Д.Мөнхтүвшин 22 оноо 7 самбар Dean Headley 20 оноо 3 бөмбөг таслалтыг тус тус гүйцэтгэсэн юм. Харин Дорнод Танан Гарьдууд тоглолтын 4-р үеийн эхлэлийг тун сайн эхлүүлж оноог тэнцүүлж ирсэн ч шийдвэрлэх мөчид О.Ууганбаяр нүүрний шугамаар бөмбөг алдаж 85-81-ээр улирлын 5 дахь хожлоо хүлээсэн юм. Тэднээс төвийн тоглогч М.Дорждагва, О.Ууганбаяр нар 22 оноо авсан хэдий ч Ц.Азбаяр 8 оноо 8 оновчтой дамжуулалт гүйцэтгэсэн нь тун хангалтгүй үзүүлэлт болсон юм.

Үндэсний супер лигийн нэгдүгээр тойргийн дүн:

Ч.БОЛОР