"Хотын нийтийн тээвэр, замын хөдөлгөөний оновчтой шийдлүүд" сэдэвт зөвлөгөөн ирэх даваа гаригт болох гэж байна. Хотын замын хөдөлгөөний хэт ачааллыг бууруулахын тулд нийслэлийн ИТХ-аас уг зөвлөгөөнийг зохион байгуулах юм.  Улаанбаатарын замын ачааллыг бууруулахын тулд автомашиныг улсын дугаараар ангилж хөдөлгөөнд оролцуулж байгаа ч өдөрт 370 гаруй мянган тээврийн хэрэгсэл нийслэлийн замын хөдөлгөөнд оролцдог аж. Жил бүр авто замуудыг өргөтгөж, шинэчилж байгаа ч тээврийн хэрэгсэл нэмэгдэхийн хэрээр автозамын хөдөлгөөний ачаалал улам нэмэгдэж байгаа.

Түүнчлэн замын хөдөлгөөний ачааллыг бууруулахын тулд ачаалал ихтэй уулзваруудад шар дөрвөлжин тэмдэглэгээ тавьж, дүрэм зөрчсөн жолоочид хариуцлага тооцох, борлуулалт, түгээлтийн автомашиныг ажлын бус цагаар явуулах, замын автозогсоолын хүртээмжийг нэмэгдүүлэх зэргээр тодорхой ажлуудыг хэрэгжүүлхэд бэлэн болсон байна.

Зөвлөгөөнөөр Улаанбаатар хотын замын хөдөлгөөний ачааллыг бууруулахад ямар арга хэмжээ авч болох талаар иргэдийн саналыг авах аж. Мөн зөвлөгөөнд УИХ-ын гишүүд, нийслэл, дүүргийн удирдлага, эрдэмтэн судлаачид болон холбогдох бүх албаныхан оролцох юм байна.