Улсын дуурь, бүжгийн эрдмийн театрын хамт олон түүхт 68 жилийн ой, 56 дахь тоглолтын улирлын нээлтээ ирэх ням гаригт /2018.10.07/ “Сонгодог” тоглолтоор эхлүүлэхээр болсноо мэдээллээ. Үүнээс гадна нэгэн мэдээлэл хүргэхэд тус театрын гоцлол дуучин, тенор Б.Батжаргал БНСУ-д суралцахаар болсон байна. Тэрбээр Сөүл хотод урлагийн сургуульд магистрын зэргээ хамгаалахаар болжээ. Тиймээс энэ удаагийн улирлын нээлт болох “Сонгодог” тоглолт болон “Кармен” дуурьд дуулаад БНСУ-ыг зорихоор болсон байна.

УДБЭТ-ын гоцлол дуучин Б.Батжаргал хэлэхдээ “Дуурийн театрт ороод багагүй хугацаа өнгөрлөө. Энэ хугацаанд олон сайхан дуурийн гол болон туслах дүрд дуулж байна. БНСУ-д дуучны мэргэжлээрээ суралцахаар болсон бөгөөд сайн суралцаад эх орон, аав, ээжийнхээ нэрийг өндөрт гаргахаа хичээх болно.” гэсэн юм.

Б.Батжаргал хамгийн сүүлд буюу өнгөрөгч дөрөвдүгээр сард БНАСАУ-ын Пхеньян хотод болсон “Пхеньян” дуурийн дуулаачдын анхдугаар уралдаанд Б.Батжаргал дэд байр буюу мөнгөн медальтай ирсэн юм. Тэрбээр 2017 онд “BBC Cardiff Singer of the World-2017” дуурийн дуучдын уралдаанд Монголын тенор хоолойнуудын анхдагч болж оролцон, шилдэг 20 залуу дуучны нэгээр шалгарсан манай шилдэг тенор хоолойтнуудын нэг билээ.

BBC-д онцлогдсон Б.Батжаргал

Ч.БОЛОР