НҮБ-ын Хүний эрхийн Зөвлөлөөс жил бүр зохион байгуулдаг Нийгмийн Форум арга хэмжээ энэ жил “Спорт, Олимпын үзэл санаагаар хүний эрхийг хүндэтгэж, хамгаалах үйл хэргийг дэлгэрүүлэх нь ” сэдвийн дор 10 дугаар сарын 1-нээс 3-ны өдрүүдэд Женев хотноо зохион байгуулагдаж байна.

Спортоор дамжуулан хүний эрхийг хамгаалах асуудлаар гурван өдөр хуралдаж буй тус Форумд Монгол Улсаас Гавьяат тамирчин, уулын спортын мэргэжлийн тамирчин Б.Гангаамаа оролцож байгаа бөгөөд тэрээр “Спортын салбар дахь эрэгтэй, эмэгтэй хүмүүсийн тэгш эрх” сэдэвт хэлэлцүүлэгт илтгэгчээр оролцов.

Б.Гангаамаа эмэгтэй хүн ямар ч төрлийн спортоор амжилтад хүрч болдгийг өөрийн туршлага, түүхээсээ жишээ болгон хуваалцахын сацуу эмэгтэй хүнийг зарим спортын төрлөөр хичээллэхийг дэмждэггүй нийгмийн хандлагыг өөр шиг нь амжилтад хүрсэн эмэгтэй тамирчид бүрэн өөрчлөх боломжтойг тэмдэглэж, Монголын хувьд Олимпын медальтан, нэртэй тамирчдын тал орчим нь эмэгтэйчүүд байгааг онцолсон.

Мөн тэрээр байгаль орчныг хамгаалах, өлсгөлөн ядуурлыг бууруулах замаар хүний эрхийг хамгаалах үйлсэд хувь нэмрээ оруулахыг зорьж өөрийн санаачилсан “Зулайгаас нь өлмий хүртлэх эх дэлхийгээ хайрлая” уриан дор дэлхийн 7 оргилд гарсан уулчдын уулзалтыг Монгол дахь НҮБ болон Монголын Үндэсний олипмын хороо, БСШУСЯ-ны дэмжлэгтэйгээр 2020 онд байгуулахаар төлөвлөж буйгаа танилцуулав.

НҮБ-ын Хүний эрхийн зөвлөлөөс 2007 оноос хойш хэлэлцэн баталдаг “Нийгмийн форумын тухай” тогтоолоор хүний эрхийг хамгаалах, урагшлуулах асуудлаар гишүүн орнууд, засгийн газар хоорондын байгууллага болон иргэний нийгмийн төлөөлөл хоорондын яриа хэлцээ хийх, санал солилцох механизм бий болгох зорилгоор Нийгмийн Форумын мандатыг бий болгож 2008 оноос хойш жил бүр 3 өдөр зохион байгуулж ирсэн.

Өнгөрсөн хугацаанд тус форумын хүрээнд ДОХ, халдварт өвчний дэгдэлт, ядуурал, уур амьсгалын өөрчлөлт, даяаршил, хөгжлийн бэрхшээлтэй иргэд зэрэг олон асуудлыг хөндөж хэлэлцсэн ба форумын мөрөөр гарсан дүгнэлт, зөвлөмжүүдийг НҮБ-ын Хүний эрхийн зөвлөлийн ээлжит чуулганд танилцуулж, тус Зөвлөлөөс хэлэлцэн баталдаг дээрх тогтоолын агуулгад тусгадаг.

Тус форумын хэлэлцүүлэгт Олон улсын параолимпийн хорооны Ерөнхийлөгч Э.Парсонс, ОУОХ-ны гишүүн Н.Мутавакель, Кенийн Олимпын аварга Кипчоге Кейно зэрэг хүмүүс мөн илтгэгчээр оролцож үг хэлэв.

Эх сурвалж: ГХЯ