Дани улсын  ерөнхий сайд Ларс Локке Расмуссэн өчигдөр /2018.10.02/ парламентын чуулганаар байгаль орчинд ээлтэй хөтөлбөр хэрэгжүүлэх тухайгаа мэдэгджээ.

“Дизель болон бензин түлшээр явдаг автомашинуудын хэрэглээг халах ёстой. 12 жилийн дотор бид Дани улсад шатахуун хэрэглэдэг автомашинуудын худалдааг хорих болно. 2030 он гэхэд бид цахилгаан эсвэл ямар ч утаа ялгаруулахгүй автомашиныг замын хөдөлгөөнд оролцуулна. Биднийг эко-ногоон ирээдүй хүлээж байна” хэмээн Данийн ерөнхий сайд Ларс Локке Расмуссэн мэдэгджээ.

Мөн түүний хэлснээр 2035 он гэхэд хайбрид буюу түлш-цахилгаан хөдөлгүүр хосолсон автомашинуудыг жагсаалтаас гаргахаар бэлтгэж байгаа аж.

Өмнө нь Дани улсын эрчим хүчний сайд  Ларс Лиллехолт өнгөрсөн долоо хоногт энэ талаар дурдсан боловч хэрэгжих хугацааны талаар тодорхой мэдээлэл өгөөгүй юм.

Одоогийн байдлаар хоёр сая гаруй автомашин Дани улсад бүртгэгдсэн байдаг бөгөөд урьд нь импортын автомашинуудад 180 хувийн татвар ногдуулж байсан удаатай.

ЭХ СУРВАЛЖ: EUROACTIV
Г. МАНДАХ