Зунжин амраагүй Монголын улс төр чуулган эхэлснээр улам ширүүсч байна. Чуулган эхлэхээс өмнө дуугарч эхэлсэн АН-ын бүлгийнхэн Ц.Нямдоржийг цагдаад өгөхөө ч мэдэгдээд байгаа юм. Учир нь Хууль зүйн сайд Ц.Нямдорж “Зам тээврийн яаманд хүний аминд халдсан хүнийг улс төрийнх нь угшил мугшилаар нь хөөх юм бол Ардчилсан нам, МоАХ-ын фракцын хүн юм байна лээ шүү дээ” гэж ярьсан нь  АН-ынхны бухимдлыг төрүүлж, намын нэр төрд халдсан гэж үзэж байгаа аж.

Зам тээврийн хөгжлийн яамны газрын даргаар ажиллаж байхдаа нэгийгээ хөнөөсөн гэх хэрэгт баривчлагдан хоригдож буй Б.Махбалыг манайх, танайх биш гэж МАН ч, АН ч  бие, бие рүүгээ чихэх болсон. Алдсан дээр нь нэгийгээ хөөдөг, танихгүй царайлдаг нь  манай улстөрчдийн, тэр тусмаа АН-ын хувьд гэм биш зан. Үүний өмнө С.Баярцогтын талаарх мэдээлэл Ройтэрс дээр гарсан даруйд АН-ынхан намын гишүүнээсээ хөөж байсан удаатай.

Мэдээж, хүн нэрээ тогос өдөө гэгчээр АН-ынхан нэрээ цэвэрлэж авахаар АН-ынхан Ц.Нямдоржийг цагдаад өгөхөө мэдэгдсэн ч  сайдыгаа цагдаа нь шалгаж чадах уу гэдэгт л гол асуудал нь байгаа юм.

Б.БАТ