Галд орон гэрээ алдаж, өндөр настай ээж, дөрвөн сартай бага охин болон 2, 3 настай дэрсхэн охидын хамт зүдэрч явсан  Д.Батмөнхийн тухай сурвалжлагыг ТВ5 телевизийн сэтгүүлч Г. Бадамлянхуа иргэд, олон нийтэд цаг алдалгүй хүргэсэн. Сурвалжлага энэ сарын 18-нд цацагдаж, тэр даруй Д.Батмөнхөд туслах сайхан сэтгэл өвөртөлсөн олон хүн тус телевизэд хандаж эхэлсэн байдаг. Маргаашаас нь түүнд туслах хандивын аян өрнөж, ердөө долоо хоногийн дотор Д.Батмөнхийн хандивын дансанд 85 сая төгрөг төвлөрчээ.

Тэрбээр  есдүгээр сарын 27-ны өдөр буюу намрын дунд сарын шинийн 17-ны билэгт сайн өдөр ард түмний хандивын мөнгөөр авсан байрандаа шинэ гал голомтоо бадраасан байна. Байрны эзэн нь  145 сая төгрөгийнхөө байрыг 50 хувь хямдруулаад 75 сая төгрөгөөр заржээ. Мөн жилийн есөн 900 мянган төгрөгийн төлбөртэй цэцэрлэгт Д.Батмөнхийн хоёр том охиныг хамруулахаар болсон байна.

Э.БУРАМ