9 дэх жилдээ амжилттай зохион байгуулагдаж, Улаанбаатар хотын футзалны аваргаа тодруулахад ойртож байгаа “Дуулиан 2020” тэмцээний сугалаа өнөөдөр Нийслэлийн Хангарьд ордонд боллоо. Энэ удаагийн тэмцээний 3 дах шатанд нийт 184 багийн 1800 өсвөрийн хөлбөмбөгчид аваргын алтан медалийн төлөө ур чадвар, авхаалж самбаагаа сорин өрсөлдөх юм.

“Дуулиан 2020” тэмцээний 3 дах шатны сугалааг тохируулах ёслолын ажиллагааны үеэр уг тэмцээнд оролцогч сургуулиудын баг тамирчдыг ивээн тэтгэж байгаа нийгмийн хариуцлагаа хэрэгжүүлэгч аж ахуйн нэгжийн удирдлагууд баг тамирчддаа амжилт хүсэн, урам хайрлаж, хувцас хэрэглэлийг нь гардуулан өгсөн юм. Өнөөдөр "Саммит" компанийн хамт олон  Нийслэлийн СонгиноХайрхан дүүргийн 42-р сургууль, Чингэлтэй дүүргийн 13-р хорооны 17-р сургуулийн баг, нийслэл  хотын ууган сургуулиудын нэг Сүхбаатар дүүргийн 3-р сургууль, "Ард Даатгал" компани нийслэлийн Сонгинохайрхан дүүргийн 107-р сургуулийн баг тамирчдад хувцас хэрэглэлийг нь гардуулан өглөө. 

9 дэх удаагийн “Дуулиан 2020” тэмцээний үеэр хөлбөмбөгийн спортоор дамжуулан Монголын ирээдүй хойч болсон хүүхэд багачуудад  багаар хамтран ажиллах дадал суулгах, ёс суртахууны боловсрол олгох, чөлөөт цагаа үр дүнтэй өнгөрүүлэх, гэнэн цайлган зангаасаа болж тэднийг гэмт хэргийн золиос болохоос сэргийлэх хүрээнд “Залгамжлагч Холбоо” ТББ, “Их Талын Дуулиан” ТББ, “ Агуу хүсэл мөрөөдөл” ТББ-ууд хамтран Мөрөөдлийн хөлбөмбөг хөтөлбөрийг нийслэлийн Чингэлтэй дүүргийн 37-р сургуулийг түшиглэн хэрэгжүүлж эхэлсэн юм.

Улаанбаатар хотын Чингэлтэй дүүргийн 18-р хорооны 37-р сургуулийн анги удирдсан багш нарын судалгаа, хорооны судалгаанд үндэслэн  “Мөрөөдлийн хөлбөмбөг” хөтөлбөрт 11-14 насны 60 хүүхдэд 3 сарын хугацаатай гоозүй, ёс суртахууны боловсрол олгох, хөлбөмбөгийн мэргэжлийн бэлтгэл сургуулилтанд хамруулснаар “Мөрөөдлийн хөлбөмбөг” багийнхан “Дуулиан 2020” тэмцээний 2 дах шатанд амжилттай оролцож, 3 дах шатанд оролцох эрхтэй болсон  байна. Энэ багийн гаргасан амжилт нь  ирээдүй хойч үеэ эрүүлээр сэтгэж, энх оршиход дэмжлэг үзүүлэх зорилготой энэ хөтөлбөрийн зорилго эхнээсээ үр дүнгээ өгч байгаагийн нэг тод илрэл болж байгааг албаны хүмүүс тэмдэглэж байлаа. Хөлбөмбөгийн спортоор эвлэлдэн нэгдэж, өөрсдийн зорилгодоо хүрэх ирмүүн хүсэлдээ хөтлөгдсөн “Мөрөөдлийн хөлбөмбөг” багийнханд “Их Талын Дуулиан” ТББ-ын Удирдах зөвлөлийн дарга, "Сүү Хувьцаат" компанийн гүйцэтгэх захирал Б.Гантулга хувцас хэрэглэлийг нь гардуулан өгч цаашдийн тэмцээн уралдаанд нь амжилт хүслээ

Эх сурвалж: http://likenews.mn