Өмнөд Африкийн нэгэн рестораны ариун цэврийн өрөөнд долоон настай охин хүчирхийлүүлсэн тухай Өмнөд Африкийн цагдаагийн газар CNN агентлагт мэдээлжээ. Өмнөд Африкийн Преториа хотын ресторанд болсон уг хэргийг үйлдсэн 20 настай залууг хүчингийн хэрэг үйлдсэн, хар тамхи биедээ авч явсан гэх үндэслэлээр хэргийн газар дээр нь баривчилжээ. Орон нутгийн мэдээллийн эх сурвалжийн мэдээлж байгаагаар охиныг ариун цэврийн өрөө рүү бие засахаар ороход нь гэмт хэрэгтэн түүнийг барьж аван эрэгтэйчүүдийн ариун цэврийн өрөө рүү оруулан хүчирхийлсэн байна. Ресторанд байсан хүмүүс охины хашхирах чимээг сонсоод охины ээжид хэлжээ.

Мөн саяхан 17 настай охин эмнэлэгт төрөхөөр иржээ. Үзлэг хийсэн эмчийн хэлснээр тэрбээр бас л хүчирхийлэлд өртсөнөөр жирэмсэн болсон байж. 23 настай оюутан охин амиа хорлохоор завдсан нь хоёр сарын өмнө зуслан дээр нэгэн оюутан залууд хүчирхийлүүлснээс болжээ. Энэ мэт эмэгтэйчүүдийн эсрэг хүчингийн хэрэг болон бусад бэлгийн хүчирхийллийн шинжтэй хэргүүд Өмнөд Африкт сүүлийн саруудад маш их гарах болсон нь тус улсын хувьд тулгамдсан асуудал болоод байна.

Статистикийн байгууллагаас зургаадугаар сард гаргасан судалгаагаар Өмнөд Африкийн 100 мянган эмэгтэй тутмын 138 нь бэлгийн хүчирхийлэлд өртсөн гэх тоо гарсан нь дэлхийд тэргүүлж байна. Дээрх хэрэгтэй холбогдуулан Өмнөд Африкийн эмэгтэйчүүд энэ төрлийн гэмт хэрэгт ногдуулах ялын хэмжээг нэмж өгөхийг засгийн газраасаа шаардаж байна.

Н.АМГАЛАНТУУЛ
эх сурвалж: CNN