-Телевизийн олон ангит “Саятан болгох дамжаа” кино нэгдүгээр сарын 12-ноос эхлэн өдөр бүр 20:30 цагаас “Боловсрол” суваг ТВ-ээр гарна-

“Моторын дуу” уран бүтээлийн нэгдлийн “Саятан болгох дамжаа” хэмээх 24 ангит уран сайхны киноны нээлт өчигдөр /01.09/ Паркын Castle ресторанд болжээ.

Нээлтийн ёслолд киноны гол дүрийн уран бүтээлчид болох Гавьяат жүжигчин Г.Равдан, Гавьяат жүжигчин Г.Урнаа, Соёлын тэргүүний ажилтан Л.Дэмидбаатар, У.Батбаатар,  жүжигчин Б.Болдбаатар, П.Шүүдэрцэцэг нар уригдсанаас гадна Соёлын тэргүүний ажилтан А.Миеэгомбо, А.Амарсайхан, Б.Туул, А.Мөнхсүх, Х.Баяраа нарын олон уран бүтээлчид хүрэлцэн ирсэн юм. Мөн тус киноны санхүүжүүлэгч болон төслийн хэрэгжүүлэгч нарыг төлөөлж Санхүүгийн зохицуулах хорооны дарга З.Нарантуяа, Японы ЭСЯ-ны нэдүгээр нарийн бичгийн дарга Hiroshi Fukasawa, Азийн хөгжлийн банкны суурин төлөөлөгч Роберт Шолхаммер, Төслийн захирал нар оролцлоо.

Санхүүгийн зохицуулах хорооны захиалгаар бүтээгдсэн уг киноны  зохиолыг Соёлын тэргүүний ажилтан А.Миеэгомбо бичиж, редактороор А.Амарсайхан, Ерөнхий продюссерээр Соёлын тэргүүний ажилтан Б.Туул, Ерөнхий найруулагчаар Соёлын тэргүүний ажилтан А.Мөнхсүх, Ерөнхий зураглаачаар Соёлын тэргүүний ажилтан Х.Баяраа нар ажиллажээ.  Түүнчлэн тус киноны гол дүрүүдэд Гавьяат жүжигчин Г.Равдан, Гавьяат жүжигчин Г.Урнаа, Соёлын тэргүүний ажилтан Л.Дэмидбаатар, Соёлын тэргүүний ажилтан У.Батбаатар,  жүжигчин Б.Болдбаатар, П.Шүүдэрцэцэг нар тоглосон юм.

Ийнхүү “Санхүүгийн үйлчилгээний хүртээмжийг нэмэгдүүлэх” төслийн хүрээнд нийгмийн зорилтот бүлгийнхэнд санхүүгийн боловсрол, санхүүгийн үйлчилгээний талаарх мэдлэгийг хамгийн олон мэдээллийг хүргэн зорилгоор “Саятан болгох дамжаа” телевизийн олон ангит уран сайхны кино бүтээгдсэн ажээ. Тус киноны гол дүрийн баатруудын амьдралд тохиолдож байгаа санхүүгийн ололт амжилт, саад бэрхшээл түүнийг шийдвэрлэж байгаа арга барилыг бодит амьдралд тулгуурласан санхүү мөнгөний харилцаагаар дамжуулан адармаатай үйл явдлаар баяжуулж олон нийтийн хүртээл болгосноор иргэд дүрүүдийн амжилт болон сургамжаас суралцах боломжтой гэж төсөл хэрэгжүүлэгчид үзсэн байна.

Энэхүү “Саятан болгох дамжаа” телевизийн олон ангит киног нэгдүгээр сарын 12-ноос эхлэн өдөр бүр 20:30 цагт “Боловсрол” суваг ТВ-ээр орон даяар дамжуулан олон нийтийн хүртээл болгох юм.

Э.ТЭКҮ