Эрүүл мэндийн  сайд асан Н.Удвал, дэд сайд асан Ж.Амарсанаа нарын дунд хэрүүлийн алим шиг шидэгдсэн элэгний С вирусын эмийг оруулж ирэх эсэх талаар Эрүүл мэндийн сайд С.Шийлэгдамба өнөөдөр мэдээлэл хийлээ.

Тэрбээр эмийн шинэчилсэн журмыг өнөөдрийн Засгийн газрын хуралдаанд оруулах гэж буйгаа мэдээлсэн юм. Эрүүл мэндийн сайд С.Шийлэгдамба “Элэгний С вирусын тухайд 10-15 жилийн дараа элэгний хатуурал хавдар болж тухайн өвчнөөр өвчилсөн хүний амийг авч оддог. Энэ өвчнөөр өвчлөгсөд жилээс жилд нэмэгдэж байгаа. Тухайлбал 2013 оны байдлаар 20-оос дээш насны хүмүүст судалгаа хийхэд тэдгээр хүмүүсийн 10.7 хувь нь уг вирусээр өвчилсөн байсан.

Өмнө нь мөрдөгдөж байсан эмийн бүртгэлийн журмаар шинээр эм бүртгэхдээ хоёр жил хүртэл хугацаагаар судлаж байж бүртгэдэг байсан. Тэгвэл уг журмын шинэчилсэн найруулгаар Эмийн хяналтын хатуу зохицуулалттай Европын холбооны орнуудад үйлдвэрлэгдсэн эмийг шууд оруулж ирэхээр болж байна. Ингэснээр 30 хоногийн дотор Монгол Улсын эмийн бүртгэлд дээрх эм бүртгэгдэх юм.  Монгол Улсын эмийн бүртгэлийн өмнө нь мөрдөж байсан журмаар Монгол Улсад шинээр бүртгэгдэх эмийг заавал гурван улсад бүртгэгдсэн, тухайн улсынхаа бүртгэлд бүртгэгдээд гурваас доошгүй жил хэрэглэгдсэн байх ёстой гэж тусгасан байжээ. Гэтэл 2009 онд Женевт хуралдсан эмийн зохицуулалтын байгууллагын зөвлөмжөөр эмийн хатуу зохицуулалттай Европын холбооны орнууд олон Америк, Япон, Солонгос, Канад зэрэг орнуудад үйлдвэрлэгдсэн эмийг хөгжиж байгаа орнууд шууд бүртгэнэ гэсэн журам гарсан аж. Энэхүү журмын дагуу эмийн бүртгэлийн журмандаа манай улс нэмэлт өөрчлөлт оруулснаар Европын холбооны эмийн хатуу зохицуулалттай орнуудад үйлдвэрлэгдсэн эмийг шууд бүртгэх боломж нээгдэж байгаа юм байна. Уг эмийг Эм бүртгэлийн эрх бүхий байгууллагууд С вирусын эмийг хяналттайгаар оруулж ирнэ. Нийлүүлэгч байгууллагын албан мэдээлэлд хамгийн хямд үнээр Монгол Улсад нийлүүлэх боломжтойгоо мэдэгдсэн. Яг нарийн үнэ нь гараагүй байна. Бид зөвхөн журмын зохицуулалтаа хийж байгаа. Эм хоорондоо нийлүүлж байгаа аж ахуйн нэгжүүд үнийг эцсийн байдлаар тогтооно.  900 ам.доллар гэдэг нь гурван сар, 1800 ам.доллар нь зургаан сар уух эмийн үнэ юм” гэлээ.

С.ОТГОН