Монголын үндэсний сагсан бөмбөгийн холбооны “Супер лиг”-ийн тойргийн тоглолт Спортын төв ордны “А” зааланд үргэлжилж байна. Өчигдөр буюу нэгдүгээр сарын 5-ны өдрийн тоглолтын тоймыг хүргэж байна. Энэ өдөр “Эрдэнэдрийлинг ригс”, “Төв ургац” багууд өрсөлдөгчөө хожжээ.

ЭРДЭНЭДРИЙЛИНГ РИГС vs ИХ ӨРГӨӨ АРАВТУУД – 109 :106

Даваа гаригт болсон "Их өргөө аравтууд" болон "Эрдэнэдрийлинг Ригс" багуудын тоглолтод аравтууд ялалт байгууллаа. Энэ тоглолтод "Их өргөө aравтууд" багаас Aundra Williams 27 оноо, 22 самбар, Д.Мөнхтүвшин 23 оноо, С.Батбямба 21 оноо, Jordan Mccoy 17 оноо, Ш.Сэдбазар 11 оноо, 7 оновчтой дамжуулалт, 5 бөмбөг таслалт хийжээ. Харин "Эрдэнэдрийлинг Ригс" багаас Will Giddings 29 оноо, 10 самбар, Alvin Brown 19 оноо, 16 самбар, Бадрах 19 оноо, 6 оновчтой дамжуулалт, Н.Золжаргал 17 оноо, 7 самбар, Мэндбаяр 14 оноо авчээ.

Тоглолтын үндсэн цаг тэнцээгээр өндөрлөсөн. 2 баг энэ улиралд хоёулаа нэмэлт цаг сунгасан тоглолтууддаа хожоод байсан. Аравтуудын хувьд "Хэнтий Чингис Сити" багтай 2 нэмэлт цаг сунгасан тоглолт хийж, хожоод байсан бол "Эрдэнэдрийлинг Ригс" баг "Танан Гарьд"-тай нэмэлт цаг сунгаж, хожсон юм.

Харин энэ удаад "Эрдэнэдрийлинг Ригс" баг эцсийн мөчид хожил авч, 109:106 харьцаатай ялалт байгууллаа. Ингэснээр Ригс Үндэсний Супер Лигийн эхний тойргоо 6 хожил, 4 хожигдолтойгоор дуусгаж байна.

ДОРНОД ТАНАН ГАРЬД vs ТӨВ УРГАЦ – 96:99

Энэ өдрийн 2 дахь тоглолт "Дорнод Танан Гарьд" болон "Төв Ургац" гэсэн 2 хүчирхэг багуудын хооронд болсон. "Төв ургац"-ын хувьд энэ тоглолтод хожвол, 7 дахь хожлоо авсан эхний баг болох байсан. Лигт шинээр элссэн ч амжилтаараа тэргүүлж байгаа "Төв Ургац" багийн хувьд энэ томоохон сорилт байлаа.

Тоглолтын эхний хагас тэнцүүхэн өндөрлөсөн ч, 3-р үед "Төв Ургац" баг гайхалтай тоглолт үзүүлсэн. Энэ үед тэдний туршлагатай холбон тоглогч Ц.Пүрэвдоржийн холын зайн шидэлтүүд болон хурдан довтолгоонууд амжилттай болж, Төв Ургац багт 17 онооны давамгайллыг авчирсан.

Гэсэн ч лигийн эхний улирлын аварга хүчирхэг Гарьдууд, эргэн ирэлт хийх нь гарцаагүй. Гарьдууд 4-р үед хүчтэй эргэн ирэлт хийж, Ц.Азбаярын холын зайн шидэлт, О.Ууганбаярын шидэлтүүд байндаа тусч, улмаар оноогоор илүү гарч чадсан. Энэ тоглолтонд Гарьдуудаас Ц.Азбаяр 27 оноо, 9 оновчтой дамжуулалт, О.Ууганбаяр 26 оноо, 11 самбар, Б.Мөнхболд 13 оноо, М.Дорждавга 13 оноо, 14 самбар авчээ.

Гэсэн ч шийдвэрлэх үед Төвийнхөн илүү төгсгөл хийж, Donald Boone довтолгоогоо амжилттай болгосон. Төв Ургац багаас З.Дэлгэрням 24 оноо, 13 самбар, Ц.Мэргэн 18 оноо, 9 самбар, Donald Boone 16 оноо, Holmes Junior 14 оноо, 13 самбар авчээ.

Улмаар 99:96 харьцаатай Төв Ургац баг хүндхэн тоглолтонд хожиж, улирлын 7 дахь хожлоо авсан эхний баг боллоо. Мөн тэд эхний тойргийг 7 хожил, 3 хожигдолтойгоор өндөрлүүлж байна.