Нийслэлийн Байгаль орчны газар нь “Ногоон Ази сүлжээ” ТББ-ын Монгол дахь төлөөлөгчийн газартай хамтран ажиллах санамж бичгийн хүрээнд төв суурин газруудад ойн зурвас, жимс жимсгэнийн мод, бут тариалах агро-ойжуулалт хөгжүүлэх, иргэдийг чадавхжуулах үнэ төлбөргүй сургалтыг энэ сарын 11-ний өдрөөс эхлэн дүүргүүдэд зохион байгуулж байна.

Нийслэлийн Засаг дарга бөгөөд Улаанбаатар хотын захирагчийн 2018 оны үндсэн чиглэл, Байгаль орчин, ногоон хөгжлийн сайд, Сангийн сайдын хамтарсан 2013 оны А-96/71 дугаартай “Ойжуулалт, ойн аж ахуйн үйл ажиллагааг төлөвлөх, зохион байгуулах, санхүүжүүлэх, таримал ойг үнэлэх, улсын ойн санд худалдан авах, өмчлүүлэх журам”-ыг үндэслэн иргэн, аж ахуйн нэгжийн ургуулсан төгөлийг улсын ойн санд шилжүүлэн авах ойжуулалтын шинэ менежментийг нийслэлийн Байгаль орчны газраас нэвтрүүлсэнтэй холбоотойгоор тус сургалтыг зохион байгуулж байна.

Сургалтад хамрагдсан иргэд ойжуулалтын ажлын ач холбогдол, жимсний мод хэрхэн тариалах, хамгаалалтын ойн зурвас бүхий хүнсний ногооны аж ахуйг эрхлэн явуулах талаар мэдлэгтэй болж, өөрсдийн сонирхсон асуултдаа хариулт авч мэдээлэл солилцож чадсан, сайн сургалт болж байгаа талаар дурдсан байна. Тус сургалт 2018 оны 09 дүгээр сарын 21-ний өдөр хүртэл хугацаанд хуваарийн дагуу дүүргүүдэд зохион байгуулагдах юм гэж нийслэлийн Байгаль орчны газраас мэдээлэв.