УИХ-ын гишүүн, Хүнс хөдөө аж ахуйн сайд Р.Бурмаа гишүүнийхээ бүрэн эрхээс татгалзах хүсэлтийг гаргасан байна.

Шинэ он гарахаас урьтаж гаргасан түүний хүсэлтэд намаас нь албан ёсоор хариу өгөөгүй байгаа аж.

УИХ-ын гишүүнийхээ бүрэн эрхээс татгалзах болсон шалтгаанаа сайд Р.Бурмаа “Монгол Улсын Ерөнхийлөгчийн өргөн мэдүүлсэн давхар дээл тайлах хуулийн төслийг анхнаасаа дэмжиж байр сууриа илэрхийлж байсны хувьд, мөн Засгийн газрын гишүүн нь давхар дээлгүй байх ёстой” гэж үзсэний үндсэн дээр санал тавьсан” гэлээ.

Тэрээр 2012 оны УИХ-ын сонгуульд намын нэрээр дэвшиж, УИХ-ын гишүүн болсон юм. Тиймээс УИХ болоод Ардчилсан нам түүний УИХ-ын гишүүний бүрэн эрхээсээ татгалзах хүсэлтийг хүлээн авсан нөхцөлд намын жагсаалтад эрэмбэлэгдсэн дараагийн хүн орыг нь залгах ёстой. Үүгээр бол Худалдаа хөгжлийн банкны гүйцэтгэх захирал Б.Мэдрээ УИХ-ын гишүүн болох юм байна.

УИХ дахь Ардчилсан намын бүлэг өнөөдөр 13.00 цагт ээлжит хуралдаанаа зарласан ч хараахан эхлээгүй байна. Бүлгийн гишүүдийн ирц хангалтгүй байгаагаас хуралдаан хойшилж буй юм. Ийн хурал хойшилж байгаа нь сайд Р.Бурмаагийн УИХ-ын гишүүнээсээ татгалзах хүсэлтийг хэлэлцэх болсонтой холбоотой байж мэдэшгүй гэх албан бус мэдээлэл бас байгаа юм.

Г.ДАРЬ