Говь-Алтай аймгийн Онцгой байдлын газар шинэ байрныхаа нээлт болон алба сурталчилах үйл ажиллагааг өчигдөр зохион байгууллаа.

Нээлтийн үйл ажиллагаанд УИХ-ын гишүүн, Хууль зүйн байнгын хорооны дарга Ш.Раднаасэд, ОБЕГ-ын Санхүү, хангалт, хөрөнгө оруулалтын газрын дарга, дэд хурандаа Я.Гантөмөр, аймгийн ИТХ-ын дарга Т.Ганзориг, Засаг дарга С.Гансэлэм, баруун бүсийн төв-Ховд аймгийн Онцгой байдлын газрын дарга, дэд хурандаа Б.Алтанбадралт, Баянхонгор аймгийн Онцгой байдлын газрын дарга, дэд хурандаа А.Алтанбагана, Онцгой байдлын газрын ахмадын төлөөлөл оролцов.

Онцгой байдлын газрын шинэ барилга нь 20 автомашины тавиулан, оффис, 6 айлын орон сууц, бялдаржуулах танхимтай 1296 м2 талбай бүхий иж бүрэн цогцолбор бөгөөд улсын төсвийн хөрөнгө оруулалтаар баригдсан тус барилгын гадна талбайн тохижилтыг алба хаагчид өөрсдийн хүчээр бүтээн байгуулсан юм.

Харин нээлтийн ёслолын үеэр УИХ-ын гишүүн, Хуульзүйн байнгын хорооны дарга Ш.Раднаасэд Онцгой байдлын газарт КОВШ-150 трактор, 24 айлын орон сууц барих газар олгохоор шийдвэрлэлээ гэж Говь-Алтай аймгийн Онцгой байдлын газраас мэдээллээ.