Саяхан далайн хар салхи Жэбигийн аюулаас холдоод байсан Япон улсад өнгөрсөн шөнө хүчтэй газар хөдлөлт болжээ. Хоорондоо 20 минутын давтамжтай 6.7 болон 5.3 баллын хоёр газар хөдлөлт болжээ. Японы Томакомай хотод газар хөдлөлтийн голомт тодорхойлогдсон бөгөөд улмаар 1.9 сая хүн амтай Саппоро хотод хүрсэн байна.
Газар хөдлөлтийн улмаас хөрсний нуралт үүсч, олон зам, барилга байгууламж сүйдсэн болохыг тодорхойлсон бөгөөд одоогийн байдлаар 20 хүн бэртэж гэмтсэн болохыг аврах ажилтнууд бүртгэжээ. Харин цунамигийн анхааруулга зарлаагүй байна.
Мөн газар хөдлөлтөөс болж Хоккайдо мужийн цахилгаан станцад осол гарсан учраас ихэнх газрууд тог цахилгаангүй байгаа аж.
Япон улсын ерөнхий сайд Шинзо Абе газар хөдлөлтөд өртсөн Хоккайдо мужид туслуулахаар дөрвөн мянган "Японы-өөрийгөө хамгаалах" цэргүүдийг дайчилж мөн нөхцөл байдал хүнд байгаа газруудад нэмж 20 мянган цэрэг явуулахаар болсноо мэдэгджээ. Цаашид Японы Засгийн газар Хоккайдо мужийн сэргээн засварлалтын ажилд туслах болно гэдгээ зарласан байна.
ЭХ СУРВАЛЖ: NHK, ABC
Г. МАНДАХ
