Монголын үндэсний сагсан бөмбөгийн холбоо шинэ оны босгон дээр шилдгүүдээ тодрууллаа. Энэ оны шилдгийн шилдэг тамирчнаар Азийн 20 орчим орны шилдэг найман сагсчны нэгээр шалгарсан Т.Санчирыг тодруулжээ.

Тэрээр энэ улирлын лигийн тэмцээнд “Мадимос шонхорууд” (хуучнаар "Гурвантамир") багийн бүрэлдэхүүнд тоглож байна. "Мадимос шонхорууд" 6 тоглолт хийснээс 3 ялалт, 3 ялагдалтай лигийн хэсгийн тоглолтыг үргэлжлүүлж байна.

Энэ онд олон улсын чанартай цөөнгүй тэмцээн уралдаанд баг, тамирчдаа бэлтгэн оруулсан тус холбоо багийн спорт тэр дундаа Монголын сагсан бөмбөгийн спорт өндөр хөгжиж буйг "Инчён-2014" Азийн наадамд нотлон харуулсан. Энэхүү амжилтаараа сагсан бөмбөгийн эрэгтэй, эмэгтэй шигшээ баг хоккейн багийн хамтаар МҮОХ-оос оны шилдгийг тодруулдаг “Бөртэ чоно” наадмын шилдэг багийн төрөлд өрсөлдөж байна. Энэхүү шалгаруулалт энэ сарын 25-нд болох билээ.

Ч.БОЛОР