Польш улсын Дабки хотноо үргэлжилж буй 100 буудалт даамын өсвөр үе(U17), залуучуудын (U20) Дэлхийн аварга шалгаруулах тэмцээний блиц төрлийн тэмцээн өчигдөр буюу арванхоёрдугаар сарын 20-ны өдөр боллоо. Тус тэмцээнд манай тамирчдаас хамгийн өндөр амжилтыг залуучуудын охидын ангилалд өрсөлдсөн их мастер М.Нямжаргал үзүүлсэн бөгөөд тэрээр 9 оноогоор VI байрт шалгарсан байна. Залуучуудын эрэгтэйчүүдийн ангилалд өрсөлдөж буй спортын мастер Ц.Отгонбилэг 12-р байрт шалгарчээ.

Блиц төрөлд оролцсон тамирчдын амжилтыг хүргэе.   

Залуучууд, хөвгүүд

Ц.Отгонбилэг – 12-р байр (9 оноо), Ц.Сүхбат – 17-р байр (8 оноо), А.Сулеман – 22-р байр (6 оноо)

Залуучууд, охид

М.Нямжаргал – 6-р байр (9 оноо)

Өсвөр, хөвгүүд

М.Шийравжамц – 23-р байр (9 оноо), Ч.Бадамсамбуу – 33-р байр (7 оноо)

Өсвөр, охид

М.Одгэрэл – 11-р байр (10 оноо), Г.Хэрлэнмөрөн – 18-р байр (9 оноо), С.Гандиймаа – 22-р байр (8 оноо)

Харин тэмцээний үндсэн төрөл залуучуудын ангилал 8 өрөг, өсвөрийн тамирчид 9 өрөг тоглох аж. Тэмцээний 6 өргийн дараах байдлаар манай тамирчдаас залуучуудын хөвгүүдийн ангилалд Ц.Сүхбат (3 хожил, 2 тэнцээ, 1 хожигдол) 8 оноотой 4-р байрт бичигдэж байна. Мөн охидын ангилалд өрсөлдөж буй М.Одгэрэл 8 оноотой (3+2+1) 6-р байрт жагсаж байна. Түүний ангилалд 28 даамчин өрсөлдөж байгаа бөгөөд Латви, Литва, Украины даамчид тэргүүлж байна. Тэмцээн ирэх мягмар гариг буюу энэ сарын 23-нд өндөрлөнө.

Тэмцээний талаарх мэдээллийг www.mondaam.mn-с аваарай.

Ч.БОЛОР