Дэлхийн оюутны аварга шалгаруулах тэшүүрийн 2 дах удаагийн тэмцээн Казакстаны Алмата хотноо 2014 оны 12 сарын 18-22 нд болно. Тэмцээнд Норвеги, Итали, Польш, Эстон, Беларус, ОХУ, Кыргызстан, Монгол, Швед, Хятадын Тайвань, Нидерланд зэрэг 20 орчим улсын 150 гаруй тамирчид оролцох юм..

Энэ 2014 онд ОУОСХ-ноос 29-н төрлөөр оюутны ДАШТэмцээн нь зохиосон бөгөөд тэшүүрийн төрөл хамгийн сүүлд нь явагдаж байгаа юм. Тэмцээн Алмата хотын дэлхийд алдартай “Медеу” тэшүүрийн 6500 хүний суудалтай цэнгэлдэх хүрээлэнд болно. Медеу цэнгэлдэх нь Тяньшан ууланд дунд хэсэгт, далайн түвшинээс дээш 1691 метрт өргөгдөн байрласан байдаг. Энэхүү Дэлхийн оюутны аваргын тэшүүрийн тэмцээнд Монгол улсаа төлөөлж 2 тамирчин, 1 дасгалжуулагчийг бэлтгэн Монголын оюутны спортын холбоо, Монголын Тэшүүрийн холбооноос хамтран оролцуулахаар шийдвэрлэсэн юм.

Тэмцээнд МУИС-ийн оюутан А.Энх-ариун (эм) 18 настай, МУБИС-ийн БТДС-ийн оюутан Б.Тулга (эр) 19 настай тамирчид нь дасгалжуулагч ОУХМастер Ж.Долгорсүрэнгийн хамт явна. Монголын тамирчид 500 м,1000м,1500м,3000м,5000 метрийн болон нийтийн гараа гэсэн 5 зайн уралдаанд өрсөлдөх юм. Монголын залуу тамирчид хувийнхаа болон улсынхаа дээд амжилтуудыг ахиулах зорилт тавьж байна.

Дэлхийн оюутны аваргын тэшүүрийн тэмцээн нь 2012 онд анх Польшийн Закопани хотноо явагдаж эхэлсэн түүхтэй бөгөөд энэ удаа 2 дахиа болно. Харин 2016 оны тэмцээн Итали улсын Трентино мужийн Басселга ди Пине хотод явагдахаар болжээ.

Алматагийн дэлхийн оюутны АШТэмцээн нь тус хотноо 2017 онд явагдах дэлхийн оюутны өвлийн Универсиад их наадмын өмнөх томоохон сорил тэмцээн болж явагдаж байгаагаараа чухал онцлогтой юм. Монголын оюутны тэшүүрийн шигшээ баг өнөөдөр УБ-Бишкекийн чиглэлийн Туркийн авиакомпаний онгоцор нисч 12 сарын 23-нд Улаанбаатар хотноо ирэхээр төлөвлөж байна.

Т.СҮНДЭР