МАН-ын бүлгийн дарга С.Бямбацогтын хэлснээр өнөөдрийн бүлгийн хуралдаанаар дэд сайдын томилгооны асуудлыг ярилцаагүй. Харин дэд сайд болох хүсэлтээ илэрхийлсэн  хүмүүст ямар шалгуур, шаардлага тавих талаар МАН-ын дарга М.Энхболд мэдээлэл хийжээ. Одоогийн байдлаар МАН-д оногдож буй долоон дэд сайдын суудалд нэлээд олон хүн нэрээ дэвшүүлээд байгаа аж.  МАН-ын зүгээс  дэд сайдад томилогдох хүнд мэдлэг чадвар, намын төлөө сэтгэл гарган ажилласан байдлыг харгалзан үзэх гэнэ. Намаа ялагдсан хүнд хэцүү цагт намынхаа төлөө ажилласан хүмүүсээ томилох талаар ярьжээ. Хэвлэл мэдээллийн хэрэгслээр, МАН-аас дэд сайдад нэр дэвшигчдийн талаар янз бүрийн таамаг явж буй. Албан бус эх сурвалжийн мэдээллээр, Бүлгийн ажлын албаны дарга Ш.Раднаасэд,  МАН-ын Ерөнхий нарийн бичгийн даргын ахлах зөвлөх Я.Төмөрбаатар,  “Бишрэлт”-ийн Б.Ундармаа,  МАН-ын орон нутаг, намын байгуулалт хариуцсан нарийн бичгийн  дарга Х.Булгантуяа, Гадаад хэргийн дэд сайд асан Г.Тэнгэр, Баянзүрх дүүргийн Засаг дарга асан Б.Батзориг, нийслэлийн Засаг даргын орлогч асан Б.Мөнхбаатар, Хүнс хөдөө аж ахуйн дэд сайд асан, МАН-ын Зөвлөхүүдийн танхимын нарийн бичгийн дарга  Ж.Сауле нарын нэр яригдаж байгаа аж.

С.ОТГОН