УИХ өнөөдөр гурван гишүүнээр бүл нэмж, 73-уулаа боллоо. Хэдийгээр өмнө нь Өвөрхангай аймагт Ардчилсан намаас нэр дэвшсэн хоёр нэр дэвшигч тангараг өргөнө гэж яригдаж байсан ч Г.Батхүү л өнөөдөр тангаргаа өргөсөн. Харин Өвөрхангай аймагт АН-аас нэр дэвшигч Д.Зоригт УИХ-ын гишүүнээс өөрийн хүсэлтээр нэрээ татсан байна. Энэ талаар Д.Зоригтоос тодрууллаа. 

 

-УИХ-ын сонгуульд нэр дэвшигчээс нэрээ татсан гэсэн. Яагаад нэрээ татах болов?

 

-Өвөрхангай аймгийн ард түмэн УИХ-д төлөөлөлгүй нэлээд хугацааг өнгөрөөлөө. Тиймээс ард түмнийхээн сонголтыг хүндэтгээд УИХ-ын гишүүний тангараг өргөхөөс өөрийн хүсэлтээр өргөдөл гаргаж татгалзсан. Өвөрхангай аймгийн  иргэд УИХ-д төлөөлөлтэй болох, УИХ-ын үйл ажиллагаа ч гацахгүй үргэлжлүүлэх үүднээс нэрээ татсан. 

 

-МАН, АН хоёр нам тохироо хийсэн гэж өчигдөр МАН-ын гишүүд мэдэгдэж байсан. Таныг намаас чинь дарамталсан уу?

 

-Намаас дарамталж, нэрээ тат гэсэн зүйл огт байхгүй. Өвөрхангай аймгийн иргэдээ бодож би өөрийн хүсэлтээр ийм шийдвэр гаргасан. 

 

-Тангараг өргөсөн Г.Батхүүгээс илүү таныг гишүүн болох байсан гэх хүмүүс байна. Гэтэл яагаад Г.Батхүү өнөөдөр тангараг өргөж байгаа юм бол?

 

-Энд улстөрийн наймаа, намын даалгавар, тохироо байхгүй. Би зөвхөн өөрийн хүсэлтээ гаргасан. Шүүхийн процессийн дагуу явагдаж байгаа С.Чинзоригт холбогдох хэрэг үнэн зөвөөр шийдэгдээд, хууль зөрчөөгүй байвал С.Чинзориг УИХ-ын гишүүн болох боломжтой болж байгаа. Г.Батхүү гишүүний өмнөөс бол би юм ярихгүй. Энэ бол цэвэр миний хувийн сонголт. 

 

-Та өргөдлөө хэзээ өгсөн бэ. Бүлгүүд өчигдөр үдийн хавьд тохиролцоонд хүрсэн гэж байсан?

 

-Би өргөдлөө өчигдөр үдээс хойш өгсөн. Намын бүлгүүд тохиролцоо хийсэн эсэхийг би мэдэхгүй байна. 

 

 

Ш.ЧИМЭГ