ИНЕГ-аас өнгөрсөн сарын сүүлээр Хонконгт болсон Ази, Номхон далайн бүсийн иргэний нисэхийн байгууллагуудын дарга нарын уулзалтын үеэр Олон улсын иргэний нисэхийн байгууллагатай хамтран ажиллах “Хамтын ажиллагааны санамж бичиг”-т ИНЕГ-ын удирдлага гарын үсэг зуржээ. Энэхүү санамж нь манай улс агаарын замын бодлогоо шинэчлэхэд чухал нөлөөтэй хоёр үндсэн чиглэлд Олон улсын иргэний нисэхийн байгуулллагатай хамтран ажиллахаар болсон явдал юм. Тус байгууллагын зүгээс мэргэжлийн зөвлөгөө өгөх, сургалт, боловсон хүчний чадавхийг сайжруулах чиглэлээр үнэ төлбөргүй туслалцаа үзүүлэхээр болсны зэрэгцээ Монгол Улсын агаарын замд Үзүүлэлтэд тулгуурласан навигаци/ PBN/-ийг нэвтрүүлэхэд хамтран ажиллахаар болсон байна.

Уламжлалт аргаар ашиглаж байгаа манай улсын одоогийн агаарын замууд нь газарт байрлаж буй чиглүүлэх радио станцуудыг заавал дайран өнгөрдөг. Тэдгээр станц хаана байрлаж байна түүгээр дайрч өнгөрөх учраас тухайн агаарын зам нь чиг шулуун байж чаддаггүй. Өнөөдрийг хүртэл ашиглаж ирсэн уламжлалт технологи маань хоцрогдож байгаа учраас сансрын навигацид тулгуурлан агаарын замуудыг чиг шулуун болгож, олон улсын нислэгийн замуудыг PBN-д тулгуурласан навигацийн агаарын зам болгох эхлэлийг тавихаар ИНЕГ ажиллаж байгаа юм. Олон улсын иргэний нисэхийн байгууллагатай хамтран хэрэгжүүлэх үйл жиллагаа энэ сараас эхлэх ба ирэх оны 11 сард хэрэгжүүлж дуусгах шахуу төлөвлөгөөтэй. Үүнийг хэрэгжүүлснээр манай улс ирэх онд дээд агаарын зайдаа орчин үеийн шинэ технологийг ашиглаж эхлэх юм.

Монгол Улс агаарын замдаа шинэ технологи нэвтрүүлэх энэ ажилд чухал нөлөөтэй бас нэг үйл явдал болж, ИНЕГ-аас ХБНГУ-ын Агаарын навигацийн үйлчилгээний байгууллагатай хамтран ажиллахаар болсон байна. 

Монгол Улс бол Ази, Европыг холбосон агаарын хөдөлгөөний хамгийн тохиромжтой цэг буюу хамгийн богино зайд байрладаг. Шанхай, Бээжин, Сөүл, Хонконгоос эхлэлтэй Европ руу төгсөж буй болон мөн Европоос эхлэлтэй эдгээр хотууд руу төгсгөлтэй нислэгүүдийн хамгийн богино замд байрладаг учир Европын улсууд ялангуяа германы тал их сонирхдог аж. Хоёр жилийн өмнөөс талууд хамтран ажиллах санал тавьж байгаад энэ удаад ХБНГУ-д болж буй Засгийн газар хоорондын хуралдааны үеэр энэ сарын 2-нд талууд гарын үсэг зуржээ. 

Санамж бичигт дурдсанаар талууд агаарын навигацийн үйлчилгээний чиглэлийн мэргэжилтнүүдийг сургаж бэлтгэх, одоо ажилллаж буй боловсон хүчнүүдийг дадлагажуулж, сургалт хийх, шинэ техник технологи эзэмшихэд туслах, агаарын зайн урсгал төлөвлөлтийн чиглэлээр хамтарч ажиллахаар болжээ. Ийнхүү  агаарын зайн бодлогодоо шинэчлэл хийх чиглэлээр ИНЕГ-аас олон ажлыг төлөвлөн хэрэгжүүлж байна.