Энэ улиралд өнгөрсөн улирлын формоо хадгалж чадалгүй нэлээд тааруухан улирлыг эхлүүлээд байгаа алдарт "Ливерпүүл" клуб "Кристалл Палас" клубын талбайд зочлон тоглож дахин ялагдал хүлээлээ.

Өнгөрсөн арваннэгдүгээр тойрогт "Челси" клубыг талбайдаа хүлээн авч 2-1 харьцаатай хожигдож байсан бол ийнхүү дахин хожигдол амсч байна. Мөн Аваргуудын лигт ч хангалтгүй тоглож байгаа бөгөөд "Реал Мадрид" клубын талбайд зочлон тоглохдоо багийн гол тоглогчдыг сэлгээний сандалд суулгасан дасгалжуулагч Брэндан Рожерсыг ихээхэн шүүмжлэлд өртөхөд хүргээд байна.

Уг нь тоглолтын дөнгөж хоёр дахь минутад Ламберт гоолдон багтаа тэргүүлэл авчирсан хэдий ч арын шугам нь хангалттай сайн байж чадалгүй гурван гоол алджээ. 17 дахь минутад Гайл, 78 дахь минутад Лэдли, 81 дэх минутад Жединак тус тус гоолдон "Кристалл Палас" клуб гурван оноогоо халаасалсан юм.

"Кристалл Палас"-ын хувьд гурван оноо авсанаар 12 тойргийн дараах байдлаар 12 оноотой болж хүснэгтийн 15 дугаар байрт бичигдэж эхэлсэн бол "Ливерпүүл"-ийн хувьд 14 оноотой болж хүснэгтийн 12 дугаар байрт бичигдэж эхэллээ.

Эх сурвалж: ww.mminfo.mn