Японы мэргэжлийн сүмо бөхийн холбооноос энэ жилийн бүх башёгийн нийлбэр дүнгээр компаниудын тавьсан бэлэн мөнгөний бооцоо рекорд тогтоож байгааг зарлажээ. Гэхдээ мөнгөн дүнг хараахан мэдээлээгүй байна. Өмнө нь 2007 оны зургаан башёд 353.5 сая йенийн бооцоо спонсор компаниудаас цуглаж байсан нь хамгийн өндөр үзүүлэлт байжээ.

Сүмогийн башёгийн үеэр спонсор байгууллагууд барилдаан тус бүрт 62 мянган йен төлж, компанийнхаа нэр, лого бүхий далбааг сүмогийн ринг тойруулан, үзэгчдэд танилцуулдаг юм. Энэ жил гоо сайхны бүтээгдэхүүн үйлдвэрлэгч “DHC Corp”, автомашин борлуулагч “Fukuoka Toyota”, сакэ архи үйлдвэрлэгч “Kirishima Shuzo Co.” компаниуд нэмэгдэж, тэмцээний үеэр бооцоо тавьж эхэлжээ.

Фүкүока хотноо үргэлжилж буй Кюүшюү башё өндөрлөхөд гурван өдрийн барилдаан үлдээд байгаа бөгөөд 12 өдрийн дараах байдлаар ёкозүна Хакүхо, Какүрюү нар адил 11 даваа, нэг унаатай тэргүүлж байна.

Арваннэгдүгээр сарын 9-нд эхэлсэн Кюүшюү башё ирэх ням гаригт (11.23) өндөрлөх юм. 

Эх сурвалж: Bloomberg

Б.АНХТУЯА