-Тэмцээнийг 9 өдрийн дараах байдлаар ёкозүна Какүрюү М.Ананд ганцаараа тэргүүлсэн хэвээр байна.-

Мэргэжлийн сүмогийн арваннэгдүгээр сарын тэмцээн Японы Фүкүока хотноо үргэлжилж байна. Кюүшюү башёгийн ес дэх өдрийн барилдаанд ёкозүна Хакүхо М.Даваажаргал шинэхэн сэкивакэ Ичиножёо А.Ичинноровыг, башёг тэргүүлж буй ёкозүна Какүрюү М.Ананд сэкивакэ Аойямаг давлаа. Мөн ёкозүна Харүмафүжи озэки Гоэйдогоор 7 дахь даваагаа авсан юм.

Монголын сүмогийн алтан хараацай, олон рекордыг тогтоогч Кёкүтэнхо Н.Цэвэгням Точиношинийг давж, 50 хувийн амжилтаа үзүүлсэн дөрөв дэх бөх боллоо. Мөн энэ өдөр озэки Кисэносато Тоёоношимагаар 8 дахь даваагаа авчээ.

Тэмцээнийг 9 өдрийн дараах байдлаар ёкозүна Какүрюү М.Ананд 100 хувийн амжилттай тэргүүлсэн хэвээр байгаа бол ёкозүна Хакүхо М.Даваажаргал, озэки Кисэносато, Кёкүтэнхо Н.Цэвэгням нар 8 даваагаар удаалж байна.

Тэмцээний 10 дахь өдөр буюу маргааш ёкозүна Хакүхо сэкивакэ Аойяматай, ёкозүна Харүмафүжи озэки Кисэносатотай барилдана. Мөн тэмцээнийг тэргүүлж буй ёкозүна Какүрюү нутгийн бөх Тэрүнофүжитэй барилдах юм. 4 даваатай башёг үргэлжлүүлж буй сэкивакэ Ичиножёо А.Ичинноров М-1-ээс барилдаж буй Аминишикитэй, Кёкүтэнхо Жёокорюүтэй тус тус барилдана.

Монголын бөхчүүдээс: (9 өдрийн дараах байдлаар)

Ёкозүна Хакүхо М.Даваажаргал 8-1

Ёкозүна Харүмафүжи Д.Бямбадорж 7-2

Ёкозүна Какүрюү М.Ананд 9-0

Сэкивакэ Ичиножёо А.Ичинноров 4-5

М-3 Тэрүнофүжи Г.Ган-Эрдэнэ 4-5

М-10 Тамаваши Б.Мөнх-Оргил 4-5

М-11 Кёкүтэнхо Н.Цэвэгням 8-1

М-13 Таканоива А.Баасандорж 2-7

M-13 Араваши Э.Дөлгөөн 6-3

М-15 Кёкүшюүхо Т.Эрдэнэбаатар 4-5

Ч.БОЛОР