NBA-гийн "New Orleans Hornets, "Atlanta Hawks" багуудад тоглож байсан Карлделл Жонсон өнөөдөр "Чингис хаан" онгоцны буудалд газардлаа. Түүнийг Монголын үндэсний сагсан бөмбөгийн холбооны удирдлагуудын төлөөлөл тосч авсан байна.

Карлделл Жонсоны хувьд Монголын Үндэсний сагсан бөмбөгийн холбооноос зохион байгуулдаг "Супер лиг" тэмцээнд тоглох юм. Тэрээр "Өргөө" багт тоглоно.

"Супер лиг" энэ сарын 14-нд эхлэх байсан ч легонер тоглогчдын ирэх хугацаанаас шалтгаалан хойшилж, ирэх лхагва гариг буюу энэ сарын 19-ний өдөр эхлэхээр болсон юм.

Карлделл Жонсон гэж хэн бэ?

NBA буюу Америкийн Үндэсний сагсан бөмбөгийн холбооны "New Orleans Hornets" багт хүчин зүтгэж байсан мэргэжлийн тоглогч Карлделл Жонсон, Монголын Үндэсний Супер Лигт тоглохоор хүрэлцэн ирлээ. Түүний хувьд 1983 онд АНУ-ын Нью-Орлеан хотод төрсөн. Тэрээр их сургуульдаа 2002-2006 оны хооронд Солт Лейкийн коллеж болон Алабамагийн Бирминхэмийн их сургуулийн багуудад тоглож байсан. Энэ хугацаандаа 2006 онд NCAA-н 1-р дивизионы эхний багт нэрлэгдэж байснаас гадна, мөн энэ жилдээ конференцийнхоо шилдэг хамгаалан тоглогчоор тодорч байсан, шилдэг тоглогч байжээ.

Мөн 2005 оны 11-р сард Өмнөд Каролинагийн их сургуулийн эсрэг хийсэн тоглолтонд 12 УДАА БӨМБӨГ ТАСЛАЛТ хийж, NCAA-н 1-р дивизионы түүхэнд ХОЁРТ орох, түүхэн статистик үзүүлжээ. Улмаар 2006 онд NBA-д нэрээ дэвшүүлж байсан ч, сонгогдож чадаагүй байна.

Тэрээр 2006-2007 онд Бельгийн мэргэжлийн лигийн “Вервиерс Пепинстер” баг, Мексикийн дээд лигийн “Халконес де Халапа” багуудад тоглохдоо дунджаар 15,7 оноо, 3,3 самбараас бөмбөг авалт, 5,0 оновчтой дамжуулалт дундажлажээ. Мөн 2007-2011 оны хооронд NBA-н "Сан Антонио Спөрс" багийн Хөгжлийн лигийн баг болох “Остин Торос” баг багт 4 жил тоглосон байна. Энэ хугацаанд тэрээр ур чадвараа үнэлүүлж чадсанаар, 2011 онд төрөлх хотынхоо "New Orleans Hornets" багт сонгогдож, хүсэл мөрөөдлөө биелүүлж, NBA-н талбай дээр хөл тавьсан юм. Мөн тэр жилийнхээ NBA-н зуны лигт "Атланта Хоукс" багийн өмсгөлийг өмссөн. Үүний дараагаар буцаад NBA-н Хөгжлийн лигийн “Остин Торос” багтаа ирж, 2012 онд NBA-н хөгжлийн лигийн АВАРГА гэсэн эрхэм хүндтэй цол хүртжээ. Тэрээр 2014 он хүртэл “Остин Торос” багтаа тоглоод, өнгөрсөн улиралд Венесуэлийн лигт тоглосныхоо дараагаар, ийнхүү Монголын Үндэсний Супер лигт хүрэлцэн ирж байгаа нь энэ юм.

NBA-н талбай дээр тоглож байсан Карлделл Жонсоны уран гоё дамжуулалт, шилдэг хамгаалалт, бөмбөг таслах чадвар нь Монголын сагсан бөмбөгт том хөрөнгө оруулалт болох биз. Энэ жилийн Үндэсний супер лигийн тэмцээн 11 сарын 19-нд Спортын Төв Ордонд эхэлнэ.

Ч.БОЛОР