Монгол Улсын Ерөнхийлөгч Ц.Элбэгдоржийн нэрэмжит “Чингис хаан” дэлхийн цомын тэмцээн энэ сарын 23-24-ний өдрүүдэд Улаанбаатар хотноо болох билээ. Өнөөдөр тус тэмцээний бэлтгэл ажилтай танилцахаар манай улсад ирээд байгаа Олон улсын жүдо бөхийн холбооны албаны төлөөлөгчдийг БТСГ-ын дарга Ч.Наранбаатар хүлээн авч уулзлаа.  Уулзалтын үеэр ОУЖБХ-ны Энхтайваны зөвлөлийн ерөнхий захирал Жан Эрик Шиүтз “Олимпийн эрхийн оноо олгох хариуцлагатай тэмцээн тул маш өндөр хэмжээнд зохион байгуулах хэрэгтэй” хэмээн онцолж байв.  

“Дэлхийн цом”-ын тэмцээн энэ сарын 23-нд эхлэх бөгөөд үүнээс өмнө Спортын төв ордонд дахин засвар хийх шаардлагатай болж байгааг хэлсэн юм. Мөн саун, бие засах газар, заалны засварыг богино хугацаанд чанартай хийхийг албаны төлөөлөгчид анхааруулсан байна. Түүнчлэн гадаадын олон орны тамирчид Монголд ирэх тул тэдний тав тух, аюулгүй байдлыг дээд зэргээр хангах учиртайг ч сануулав.
БТСГ-ын дарга Ч.Наранбаатар уулзалтын үеэр IJF-ийн албаны төлөөлөгч болох ОУЖБХ-ны Энхтайваны зөвлөлийн ерөнхий захирал Жан Эрик Шиүтзийг “Спортын алдар” медалиар шагнаж, тэмцээнийг амжилттай зохион байгуулах талаар БТСГ идэвхи зүтгэл гарган ажиллана гэдгээ илэрхийлсэн юм.  

Б.Энх
.