Хоёр гар, хөл, тэр ч бүү хэл бүр амаараа зурдаг зураач Л.Өнөрчимэгийн талаар мэдэхгүй хүн ховор биз ээ. Сүүлийн үед нам гүмхэн байсан зураач бүсгүй усан дотор зураг зурах шоу үзүүлбэрийг энэ жилдээ багтаан хийхээр төлөвлөсөн гэнэ. Зураач Л.Өнөрчимэг нь 1999 онд бөхийн өргөөнд аквариум дотор зураг зуран тоглолтоо хийж байсан бол энэ удаагийн шоундаа зориулан өмнөхөөсөө илүү том, босоо хэлбэртэй, нэг тонн усны багтаамжтай аквариум ашиглан дэлхийн хаана ч хийж байгаагүй өвөрмөц үзүүлбэр үзүүлж, Гиннесийн амжилт тогтоох хүсэлтэй байгаа ажээ. Одоогоор мэргэжилтнүүд зөвлөлдөн усны температур, найрлагыг тогтоохоор ажиллаж байгаа бол зураач маань одооноос усанд сэлэлтээр идэвхтэй хичээллэж, гоо сайхандаа анхаарч байгаа юм байна. Зураач Л.Өнөрчимэг нь өөрийн урландаа сургалт явуулдаг бөгөөд энэ зун хятад, орос, өвөрмонгол гээд гадаадын таван хүүхэдтэй хичээллэж байгаа аж. Мөн тэрбээр дэлхийн олон үзэгчдийн анхаарлыг татаад байгаа дүрслэх урлагийн шинэ төрөл болох элсээр зурах урлагаар хичээллэж байгаа гэнэ.

Г.Даша