Эстони улсын нийслэл Таллинн хотноо зуун буудалт даамын өсвөрийн Дэлхийн аварга шалгаруулах тэмцээн аравдугаар сарын 26-наас арваннэгдүгээр сарын 1-ний хооронд болж өнгөрлөө. Тус тэмцээнд Монгол Улсаас 12 тамирчин өрсөлдсөнөөс нэг мөнгө, нэг тавдугаар байрт шалгарсан амжилтыг үзүүлсэн билээ. Монголын даамын холбооноос өнөөдөр MN мэдээллийн төвд сэтгүүлчдэд мэдээлэл хийлээ.

Азийн даамын холбооны ерөнхийлөгч, Монголын даамын холбооны нарийн бичгийн дарга Ч.Бат-Эрдэнэ хэлэхдээ: “Эстони улсын Таллинн хотод болсон өсвөрийн ДАШТ-д 15 орны 130 гаруй тамирчид оролцлоо. 8-10, 11-13 насны ангилалаар болсон тус тэмцээнд Монгол Улсаас 12 даамчин өрсөлдөв. Нас бүрт гурван тамирчин оролцох эрхийг олгосон байгаа. Тэмцээнд Европоос оролцсон тамирчид өндөр амжилтыг үзүүлсэн. Ази тивээс оролцсон БНХАУ, Монгол Улс тус бүр нэг мөнгөн медаль хүртсэн амжилтыг гаргалаа. Манай тамирчдаас охидын 8-10 насанд өрсөлдсөн Б.Мөнхжин боломжит 18 онооноос 14 оноог авч дэд байрт шалгарсан юм. Тэрээр 9 өргөөс 7 хожил, 2 хожигдолтойгоор 28 хүүхдээс хоёрдугаар байрт шалгарлаа. Өнгөрсөн жилийн ДАШТ-д Г.Дүүрэнбилэг мөнгөн медаль хүртэж байсан бол энэ жил Б.Мөнхжин медалийн буухиаг тасалсангүй. Мөн хөвгүүдийн 8-10 насанд Э.Үйлстөгөлдөр V байрт шалгарсан. Нас бүрт 28-31 тамирчин өрсөлдсөн. Тус тэмцээнд оролцсон манай тамирчдын хувьд улсын аварга, Азийн аварга болон сорил тэмцээнүүдэд оролцож, нийлбэр дүнгээр өндөр оноотой тамирчид явсан байгаа. Бусад тамирчдын хувьд медаль хүрэх боломж байсан боловч зарим тамирчдын тухайд туршлага дутлаа. Мөн Монголын даамын холбооны mondaam.mn сайтад цаг үеийн мэдээлэл байгаа юм.” гэв.

Тун удахгүй Дэлхийн аваргын мөнгөн медаль, Ази тивийн аварга Б.Мөнхжингийн ээжтэй хийсэн ярилцлагыг хүргэх болно.

2014 оны өсвөрийн ДАШТ-д Монгол Улсаас 12 даамчин оролцсон бөгөөд амжилтыг танилцуулья:

Хөвгүүд

8-10 нас: (28 даамчин)

Э.Үйлстөгөлдөр 12 оноогоор V байр (4 хожил, 4 тэнцээ, 1 хожигдол)

Б.Сүхбат 10 оноогоор X байр (4+2+3)

Б.Баярмагнай 8 оноогоор XVII байр (3+2+4)

11-13 нас: (31 даамчин)

Ц.Чинзориг 11 оноогоор XI (4+2+3)

С.Мөнх-Оргил 8 оноогоор XXIII (2+4+3)

М.Лувсандорж 8 оноогоор XXVII (2+4+3)

Охид:

8-10 нас: (28 даамчин)

Б.Мөнхжин 14 оноогоор МӨНГӨН медаль (7+0+2)

Б.Өнөржаргал 10 оноогоор IX байр (5+0+4)

Б.Мишээл 10 оноогоор XI байр (4+2+3)

11-13 нас (28 даамчин)

С.Энхтүвшин 10 оноогоор VII байр (3+4+2)

Г.Дүүрэнбилэг 10 оноогоор IX байр (2+6+1)

Э.Маргад 10 оноогоор X байр (4+2+3) тус тус шалгарчээ.

Ч.БОЛОР